Bill vs ’no permit, no exam’ policy, ipasa na!

MANILA, Philippines — Hinikayat ni Senador Chiz Escudero ang mga kapwa mambabatas na kaagad ipasa ang panukalang nagbabawal sa “no permit, no exam” policy na ipinapatupad ng ilang educational institutions na tinawag niyang pinakamalupit na multa para sa mga estudyante.

Sinabi ni Escudero, chairman ng Committee on Higher, Technical and Vocational Education na dapat agad nang ipasa ang Senate bill 1359, per Committee Report No.6 na bukod sa nagbabawal sa “no permit, no exam” policy ay nagbabawal din ito sa mga pribado at pampublikong eskwelahan na hindi pakuhain ng exam ang mga estudyante na mayroong utang o property obligations tulad ng hindi bayad na tuition at iba pang school fees.

Partikular din na tinukoy ni Escudero ang nakasaad sa panukala na nagbabawal sa mga educational institutions na pakuhanin ang mga estudyante ng permit para makapag-exam o anumang uri ng education assessment mula sa school authorities bago ang ekasaminasyon o assessment.

Ipagbabawal din ang pag-uutos sa mga estudyante o mga magulang at legal guardians na magbayad ng bahagi ng financial o property obligations bago ang eksaminasyon o assessment.

Gayundin ang pagtatakda ng multa o interes sa outstanding financial o property obligations na lalampas sa itinakdang maximum interest.

Sa ilalim ng panukala tanging ang school management lang ang mananagot sa sinumang lalabag dito sa sandaling maisabatas at hindi kasama ang mga guro.

Itinakda ang multa mula P20,000-P50,000 sa sinumang lalabag dito.