Importasyon ng 440K MT asukal, ‘di pa pirmado ni Pangulong Marcos - SRA

MANILA, Philippines — Hindi pa pirmado ni Pangulong Ferdinand Marcos Jr. ang Sugar Order No. 6 na nagpapahintulot na mag-import ang Pilipinas ng 440,000 metriko tonelada ng asukal para punan ang pangangailangan dito ng ating bansa.

Ayon kay Sugar Regulatory Administration (SRA) Board member Pablo Luis Azcona, si Pangulong Marcos bilang Secretary of Agriculture at Sugar Regulatory Administration Board chairman ay kailangan munang mag comment sa naturang kautusan bago itakda ang sugar importation.

Anya, naipadala na nila ang naturang kautusan sa Malakanyang para sa reaksiyon dito ng Pangulo. Kung maibalik man anya ito sa SRA nang walang comment si Pangulong Marcos ay nangangahulugan ito na aprub na ang naturang kautusan.

Ang  Sugar Order anya ay magiging balido kapag nalagdaan ng tatlong miyembro ng board at ng ex-officio chairman sa Department of Agriculture.

Noong nakaraang taon ay itinanggi ng Malakanyang ang SO No. 4 para sa importasyon ng 300,000 metric tons ng puting asukal dahil walang pirma ng Pangulo.

Niliwanag ni Azcona na ang SO No. 6 na nilagdaan na nina Agriculture Senior Undersecretary Domingo Panganiban, acting SRA Administrator David John Thaddeus Alba, at Millers Representative Mitzi Mangwang ay dumaan sa tamang proseso.