Special jobs fair sa 250 biktima ng illegal recruiter, handog ng DMW
MANILA, Philippines — Isang special jobs fair ang inorganisa kahapon ng Department of Migrant Workers (DMW) para sa 250 job seekers na biktima ng large-scale illegal recruitment.
Ang nasabing jobs fair ay iniutos ni Migrant Workers Secretary Susan Ople na nagbibigay din ng libreng legal assistance sa mga nagnanais na magsampa ng kaso laban sa kanilang mga illegal recruiter.
Sa isang pahayag, sinabi ng DMW na 17 lisensyadong recruitment agencies ang nakibahagi sa jobs fair na ginanap sa ground floor ng POEA Ople Building sa Mandaluyong City.
Ang jobs fair ay nag-aalok ng mga aprubadong job order para sa mga cleaners, karpintero, kasambahay, kitchen and restaurant workers, hairdressera para sa New Zealand, Qatar, Saudi Arabia, at Japan.
“There were 757 who applied, and out of the 757 applications, 121 were deemed qualified, 607 were scheduled for further interview, and one was hired on the spot,” ani Ople.
Karamihan sa job seekers ay biktima ng large scale illegal recruiters mula sa Davao City na nahuli sa pamamagitan ng pagsasanib-pwersa ng pulisya, local government units (LGUs) at DMWs Anti-illegal Recruitment Branch.
- Latest
