Mga patay ginagamit para makakuha ng government IDs
MANILA, Philippines — Ibinunyag ni Senator JV Ejercito na ginagamit ng mga dayuhan ang pagkakakilanlan ng mga patay na tao para makakuha ng government issued identification cards sa Pilipinas.
Sa pagdinig ng Senate Committee on Public Order and Dangerous Drugs kaugnay sa serye ng pagkidnap at pagdukot sa bansa, hinikayat ni Ejercito ang Philippine National Police (PNP) na paigtingin ang operasyon laban sa mga ganitong krimen.
Giit ng senador, maraming foreign nationals partikular na mula sa mainland China ang pumasok dito na gumagamit ng identities ng mga patay na tao para maikonsiderang Filipino citizens.
Kinumpirma rin naman ni Fortunato Manahan Jr., OIC deputy commissioner ng Bureau of Immigration (BI) na mayroon silang mga pinadeport na foreign nationals dahil sa paggamit ng mga pekeng pasaporte at marriage certificates.
Nauna nang naghain ng Senate Resolution No. 194 si Ejercito na imbestigahan ang nakaalarmang pagtaas ng kaso ng kidnapping, abduction at pagkawala lalo na ng mga kababaihan, Philippine Offshore Gaming Operator (POGO) workers, at mga Filipino-Chinese individuals.
Partikular na pinaimbestigahan ang umano’y pagkidnap sa isang Chinese national sa Skyway at ang dokumentadong pag-torture sa isang biktima na tinanggal ang tenga.
Giit ni Ejercito, dapat maberipika kung tunay ang nasabing mga video para masolusyunan ang problema at hindi magdulot ng panic sa publiko lalo na sa sektor ng mga negosyante.
- Latest
