Hatian ng komite sa Senado plantsado na

MANILA, Philippines — Ngayong sigurado na ang Senate presidency sa papasok ng 19th Congress ay inihayag ni Majority leader Juan Miguel Zubiri ang mga napagkasunduan na distribusyon ng chairmanship ng mga komite sa umano’y supermajority ng Senado.

Ito ay dahil sa Senate presidency ay kasama sa pangunahing konsiderasyon ang hatian sa mga komite at isa rin sa inuunang ayusin ng Senate president ang chairmanship.

Itinalaga bilang Senate President Pro-Tempore si  Loren Legarda, Majority Leader si Joel Villanueva habang mananatili bilang chairman ng Finance Committee si Sen. Edgardo Angara.

Sa mga bagong senador tulad ni Senator-elect Robin Padilla mapupunta ang Committee on ­Constitutional Amendments bukod pa ang Committee on Social Justice.

Kay Senator-elect Raffy Tulfo naman ay bibiyakin ang Committee on Labor and Employment at Committee on OFWs, habang ang Committee on Labor ay ibibigay kay Sen. Jinggoy Estrada.

Para naman kay Sen. Mark Villar, ayon kay Zubiri ay pag-uusapan pa kung anong komite ang ibibigay sa kanya samantalang kay Sen. Win Gatchalian ang Committee on Basic Education at Ways and Means.

Para kay Sen. Nancy Binay ay Committee on Accounts at Tourism, at Committee on Justice ay mapupunta kay Escudero.

Ang Blue Ribbon Committee naman ay ibibigay kay Sen. Francis Tolentino, habang ang Committee on Foreign relation ay kay Sen. Imee Marcos.

Habang ang Committee on Agriculture at Environment ay ibibigay kay Sen. Cynthia Villar; Sen. Bong Revilla, Committee on Public Works; Sen. Grace Poe, Committee on Public Services and Banks at si Sen. Bong Go, Committee on Health.

Samantala si Sen.Koko Pimentel ay hindi na umano kailangan ng komite kung siya ang magiging minority leader.