Hindi ‘yan mangyayari’ — Marcos Camp
MANILA, Philippines — Hindi umano mangyayari ang “one-on-one” debate makaraang tanggihan agad ng kampo ni dating senador Ferdinand “Bongbong” Marcos Jr. ang hamon ni Vice President Leni Robredo.
“Sa debate na hamon kay presidential frontrunner Bongbong Marcos ay hindi ito kailanman mangyayari sa ilang kadahilanan,” ang agad na tugon ni Vic Rodriguez, tagapagsalita ni Marcos.
“At batid ni Ginang Robredo ang mga kadahilanang ‘yan.”
Iginiit ni Rodriguez na may magkaibang pananaw ang dalawang kandidato ukol sa mga political debates. Positibong pangangampanya umano ang ginagawa ng UniTeam ni Marcos habang inakusahan ang kampo ni Robredo na pawang paninira lang ang ginagawa.
“Positibong pangangampanya at walang paninira ang gabay ng UniTeam ni Bongbong Marcos. At derecho sa taumbayan ang mga mensahe nito at ang panawagan ng pagkakisa,” ani Rodriguez. “Pawang mga negatibo, panlilinlang at paninira naman ang sa kampo ng dilawan.”
Idinagdag pa ni Rodriguez na kailangan ngayon ng publiko na makakita ng kalmadong mga lider habang sumusuong ang bansa sa krisis sa ekonomiya dulot ng pandemya. — Joy Cantos
- Latest