Chiz hataw din sa OCTA senatorial survey

MANILA, Philippines — Muling napabilang sa mga nangungunang kandidato sa pagka-senador si Sorsogon Gov. Chiz Escudero sa bagong opinion polls na inilabas ng research group na OCTA tatlong linggo bago ang halalan sa Mayo 9.

Kung ginanap ang halalan sa panahong ginawa ang survey mula Abril 2-6, 50% ang nagsabi na kanilang iboboto si Escudero, na isang beteranong mambabatas na naglingkod sa Senado nang dalawang magkasunod na termino, ayon sa pinakabagongnationwide polls ng OCTA Research na tinawag na “Tugon ng Masa.”

Si Escudero, na tanging kasalukuyang gobernador na tumatakbo para sa Senado, ay rumanggo nang 2-6 sa OCTA Research Senatorial Preference survey na isinapubliko noong Abril 17.

Palaging nangunguna ang beteranong mambabatas para sa mga respondent base na rin sa mga survey na isinasagawa ng iba’t ibang independent pollsters at research firms.

Lumilitaw rin na gustong-gusto manalo ng mga estudyante ang dating senador para sa karera sa Senado na makikita naman sa mga resulta ng mock elections na isinagawa ng hindi bababa sa 36 kolehiyo at unibersidad sa buong bansa.

Ang mga resulta ng nasabing campus mock elections ay lalong nagpatibay sa posisyon ni Escudero bilang isa sa 12 nangungunang senatorial candidates mula sa 60 aspirante na nagnanais makapasok sa mga pinaglalabanang puwesto sa Senado.