Duterte ipinahahanda ang drug war report para sa ICC
MANILA, Philippines — Inatasan ni Pangulong Rodrigo Duterte si Department of Interior and Local Government Secretary Eduardo Año na maghanda ng report tungkol sa kampanya ng gobyerno laban sa ilegal na droga.
Nais ng Pangulo na ilagay sa report kung gaano karami ang ilegal na droga lalo na ang crystal meth o shabu ang nasabat o nakumpiska ng mga awtoridad sa loob ng kanyang termino.
Sinabi ni Duterte na kapag dumating na ang oras ay maaaring ipakita sa International Criminal Court ang report. Muling binanggit ni Duterte na hindi siya magpapasakop sa jurisdiction ng ICC at dapat nilang makita kung gaano kalawak ang problema ng shabu sa bansa.
Sinabi naman ni Año na tinatayang nasa P79 bilyon hanggang P80 bilyon ang halaga ng shabu na nakumpiska ng mga alagad ng batas.
Mula aniya noong Disyembre 5 hanggang 11 ay nakapagsagawa ng 940 operasyon ang mga alagad ng batas kung saan naaresto ang nasa 1,253 suspects. Dalawampu’t isa sa mga drug offenders ay sumuko sa mga awtoridad samantalang wala namang naiulat na napaslang sa magkakahiwalay na operasyon.
Iniulat din ni Año na nasa P72.8 milyong halaga ng ilegal na droga ang nasabat sa anim na araw na operasyon.
- Latest
