Nakakumpleto ng 2nd dose ng bakuna 714K pa lang

MANILA, Philippines — Wala pang isang milyon ang mga mamamayan na kumpleto na ang bakuna laban sa COVID-19.

Sa datos na inilabas ni Presidential Spokesperson Harry Roque, nasa 714,442 pa lang ang mga nabigyan na ng una at ikalawang dose ng bakuna.

Sa nasabing bilang, 414,467 ang mga A1 health workers; 82,999 ang senior citizens; 216,775 may ibang sakit o comorbidities; at 193 ang mga economic frontliners.

Pero sa kabuuan aniya ay halos tatlong milyon o 2,959,829 doses na ang naibigay na bakuna bagaman at wala pang isang milyon ang nakakakumpleto ng ikalawang dose.

Sinabi rin ni Roque na kapag dumating na ang maraming bakuna ay ilalaan ang 42% sa National Capital Region Plus kasama na ang Metro Cebu at Metro Davao samantalang ang mahigit sa 60% ay mapupunta sa nalalabing bahagi ng Pilipinas.