2022 presidential survey? 'Maaga pa para mamulitika,' ayon sa kampo ni Robredo
MANILA, Philippines — Malamig pa sa ideya ng election surveys ang ilang prominenteng political figures kung Halalang 2022 ang pag-uusapan — mas marami pa raw kasing importanteng suliraning kinakaharap ang karaniwang Pilipino sa ngayon.
Ito ang magkamukhang pahayag, Biyernes, ng mga usap-usapang patatakbuhin ng administrasyon at oposisyon para sa mga national positions gaya na lang ng pagkapresidente.
"The elections are still a long way away so we do not really pay much mind to these early survey results," pahayag ni Barry Gutierez, tagapagsalita ni Bise Presidente Leni Robredo, sa isang pahayag ngayong Biyernes.
"Right now, the VP is still focused on working to help our fellow Filipinos get past the crisis of Covid-19, and recover from the calamities of the past few months."
Ayon kay Guttierez, hindi pa panahon sa ngayon ang "mamulitika" at "makipaggitgitan" sa larangan ng eleksyon.
Kahapon lang nang maibalitang nangunguna sa 2022 presidential preference survey ng Pulse Asia Survey Inc. si Davao Mayor Sara Duterte-Carpio, ang babaeng anak ni Pangulong Rodrigo Duterte.
Basahin: Presidential daughter nanguna sa 2022 presidential survey ng Pulse Asia
Pero kung si Duterte-Carpio ang tatanungin, wala pa sa interes ng mga Pilipino ang agawan ng kapangyarihan.
"[W]e focus firmly on how to survive the economic and humanitarian crisis still in front of us as we continue to battle the effects of COVID-19 on our people and our country," sabi ng nakababatang Duterte sa report ng ABS-CBN.
"Nevertheless, I respectfully suggest to survey organizations to remove my name from the choices. Thank you."
Matatandaang "wala ring interes noon" sa pagtakbo ang kanyang ama para sa 2016 national elections hanggang sa matapos na lang ang deadline ng filing ng certificate of candidacy (COC).
Sa kabila nito, nakatakbo pa rin at nanalo bilang ika-16 presidente ng Republika ng Pilipinas ang nakatatandang Duterte matapos maging substitute candidate ni Martin Diño para sa partidong PDP-Laban. — may mga ulat mula kay Xave Gregorio
- Latest
