10K emergency na trabaho, ibibigay sa Isabela at Cagayan
MANILA, Philippines — Naglaan ang Department of Labor and Employment (DOLE) ng 10,000 trabaho sa ilalim ng TUPAD program para sa mga residente ng lalawigan ng Isabela at Cagayan na naapektuhan ng matinding baha dulot ng bagyong Ulysses.
Sinabi ni Labor Secretary Silvestre Bello III na binigyan na nila ng awtoridad ang mga pamahalaang panlalawigan ng Isabela at Cagayan na tumanggap ng mga manggagawa sa ilalim ng TUPAD.
“Doon naman sa TUPAD, ito ‘yung emergency employment program, binigyan po namin ng authority si Governor Mamba na mag-hire ng 5,000 tao para maglinis at mag-ayos sa lalawigan ng Cagayan,” ayon kay Bello.
Ang TUPAD ay ang ‘emergency livelihood program” ng DOLE na nagbibigay ng trabaho sa mga nangangailangan para makatulong sa pangangailangan ng publiko.
Pangunahing gagawin ng mga makukuha sa TUPAD ay ang paglilinis sa mga apektadong lugar sa mga tambak na putik, nasirang mga imprastraktura at mga nagkalat na debris.
- Latest
