Pinas nangunguna na sa COVID-19 cases sa Southeast Asia
MANILA, Philippines — Naunahan na ng Pilipinas ang Indonesia na may pinakamaraming bilang ng kumpirmadong kaso ng COVID-19 sa Southeast Asia makaraang maitala ito kahapon sa 119,460 kabuuang kaso.
Kahapon, nakapagtala naman ang Indonesia ng 118,753 kabuuang kaso na may 5,521 nasawi at 75,645 recoveries.
Mas mababa naman ang death toll ng Pilipinas na nasa 2,150 lamang at may kabuuang bilang ng recoveries na 66,837.
Aminado naman dito ang Department of Health (DOH) ngunit ipinagmalaki nila na ang mas mataas na bilang ng kaso ay dahil sa nanguna na rin ang Pilipinas sa may pinakamaraming COVID-19 testing na na-isagawa sa 99 nilang testing laboratories.
Sa datos ng DOH nitong Agosto 4, may 1,643,539 tests na umano silang naisagawa na may average na 28,938 kada araw sa loob ng nakalipas na pitong araw.
Mas mataas ito kumpara sa 908,000 tests na naisagawa ng Indonesia noong Agosto 4 na may average umano na 14,291 tests sa nakalipas na pitong araw base sa Our World in Data.
Nasa 1.5% rin umano sa populasyon ng Pilipinas ang naisagawang tests ng DOH kumpara sa 0.34% ng populasyon na naisagawa ng Indonesia.
- Latest
