ABS-CBN humingi na ng TRO sa SC

MANILA, Philippines — Pormal nang hiniling ng ABS-CBN Corp. sa Korte Suprema na maglabas ng temporary restraining order (TRO) laban sa ‘cease and desist order’ na inilabas ng National Telecommunications Commission (NTC).

Sa 46-pahinang petition for certiorari and prohibition, hiniling ng media corporation sa SC na balewalain ang CDO at magdeklara ng permanenteng ‘injunction’ laban sa implementasyon nito.

Katwiran ng ABS-CBN, nagkaroon ng ‘grave abuse’ ang NTC nang magpalabas ng CDO sa halip na hayaan ang Kongreso na mag-isyu ng ‘provisional authority’ para mahayaan silang makapag-operate habang nakabinbin ang kanilang aplikasyon sa renewal ng prangkisa.

Nilabag umano ng NTC ang kanilang kara­patan para sa patas na proteksyon sa batas at due process nang mag-isyu sila ng CDO nang walang notice sa kanila at pagdinig. Dati naman umanong pinapayagan ng NTC ang ibang broadcast network na mag-ope­rate habang naka-aplay ang kanilang renewal.

Iginiit rin nila na ang pagpapatigil ng kanilang operasyon ay isang pag­labag sa kalayaan sa pamamahayag at sa karapatan ng publiko sa impormasyon habang magkakaroon ng masamang epekto sa libo-libo nilang empleyado kung hindi mapipigil ang CDO.