Military hospitals pinagagamit vs COVID
MANILA, Philippines — Dahil sa kakulangan ng mga ospital para sa tumataas na bilang ng mga tinatamaan ng nakahahawa at nakamamatay na virus ay dapat nang buksan ng Armed Forces of the Philippines at Department of National Defense ang mga ospital nito.
Tinukoy ni Albay 1st District Rep. Edcel Lagman na kabilang sa mga pangunahing military hospitals na may 2,451 bed capacity ay ang AFP Medical Center o dating V. Luna Medical Center na (1,200 bed capacity); Army General Hospital (200); Air Force General Hospital (100) habang ang Navy General Hospital at Cavite Naval Hospital ay nasa 185 at ang Veterans Memorial Medical Center ay 766 bed capacity.
Sinabi ni Lagman na bukod sa Veterans Memorial Medical Center at V. Luna Medical Center na may 5 at 1 COVID-19 positive patients na naitala nitong April 2, ang iba pang military hospital ay walang rekord na may na-confine na nagtataglay ng nasabing karamdaman.
Nabatid pa sa Kongresista na limang nangungunang mga ospital sa Metro Manila na may pinakamaraming pasyente sa COVID 19 ay ang St Lukes Global City na nasa 91 katao, St. Lukes Quezon City, 81; Makati Medical Center, 72 ; Lung Center, 62 at Medical City-Ortigas na nasa 56 pasyente.
- Latest
