Pag-uwi ng Pinoy crew mula Japan naudlot
MANILA, Philippines — Naudlot ang nakatakdang pagpapauwi ngayon (Pebrero 23) sa mga Pinoy crew ng MV Diamond Princess na nasa Japan.
Nilinaw ng Department of Health na ipinagpaliban ng Inter-Agency Task Force on Emerging Infectious Disease (IATF-EID) ang repatriation hanggang sa unang bahagi ng susunod na linggo dahil hindi pa nakukumpleto ang laboratory testing ng mga Filipino crew at ang Japanese quarantine protocols.
Mahigpit din namang nakikipag-ugnayan ang Tokyo Embassy ng Pilipinas sa Japanese health and foreign ministry upang makumpleto ang quarantine protocols upang kaagad na maiuwi ng pamahalaan ang mga Pinoy crew members sa Pilipinas.
Sinimulan aniya ang testing noong Biyernes ngunit dahil sa dami ng mga repatriates ay hindi agad natapos ang pagsusuri.
Pangalawang dahilan aniya ay ang pagkakaroon ng long weekend off ng mga Japanese personnel sa Pebrero 22 at 23 kaya walang ground handlers sa airport na pupuntahan ng mga repatriates.
Nabatid na nasa 538 ang mga Pinoy crew na sakay ng cruise ship ngunit nasa 497 pa lamang umano sa mga ito ang nagpaabot ng intensiyong umuwi ng Pilipinas.
Sa kabilang dako, napaulat naman na nasa 52 na sa mga Pinoy sa cruise ship ang nagpositibo na sa COVID-19 at kasalukuyang nilalapatan ng lunas sa pagamutan sa Japan.
Tiniyak naman na ng DOH na tanging ang mga Pinoy lamang na magnenegatibo sa virus ang ililikas at iuuwi ng Pilipinas habang ang mga makikitaan ng sintomas ng sakit ay dadalhin sa medical facility upang lunasan.
May mga Pinoy crew na rin naman umano ang nagsabing mananatili sila roon at hindi na lamang magpapalikas.
- Latest
