DOLE handa uling mag-'deployment ban' sa Kuwait sa pagkamatay ng OFW

MANILA, Philippines — Handa ang gobyerno na ipatigil ang pagpapadala ng mga manggagawang Pilipino sa Kuwait kasunod ng panibagong kaso ng pagkamatay ng Pinay sa kamay ng kanyang amo, paglalahad ng Department of Labor and Employment, Miyerkules.

Lunes nang kumpirmahin ng Department of Foreign Affairs ang pagkamatay ni Jeanelyn Padernal Villavende, na diumano'y pinaslang ng misis ng kanyang employer.

Sa panayam ng DZMM, sinabi ni DOLE Secretary Silvestre Bello III na may posibilidad na magpatupad ng deployment ban sa Kuwait kung hindi mabibigyang katarungan ang pagkamatay ni Villavende.

"Handa akong gawin 'yon. Ngayon, hindi maliit ang posibilidad na magpatupad ng deployment ban sa Kuwait, maliban na lang kung maipakikita nila na kaya nilang bigyang hustisiya si Jeanelyn," ani Bello sa Inggles.

Wika ng DOLE, "malinaw na paglabag" ang kanyang pagkamatay sa nilagdaang kasunduan ng Kuwait at Pilipinas noong 2018, na naglalayong protektahan ang karapatan at kapakanan ng mga manggagawang Pilipino sa nasabing bansa.

Ibinunga ang usapan matapos mapatay ang Filipina domestic worker na si Joanna Demafelis, na isinilid ang bangkay sa freezer.

Una nang sinabi ni Pangulong Rodrigo Duterte na mayroong "marka ng torture" at "pananakal" ang labi ng biktima.

Bagama't itinutulak ng ilang grupo ng kilusang paggawa ang ang pagpapadala ng Pinoy sa Kuwait, nangangamba naman ang ilan na maitutulak nito ang mga Pinoy na mas sumugal nang malaki sa layuning makahanap ng trabaho sa ibayong dagat. — James Relativo at may mga ulat mula kay Ian Nicolas Cigaral