Budget ng Kamara kakapusin sa dami ng deputy speakers at empleyado
MANILA, Philippines — Dahilan sa pagdami ng bagong Deputy Speakers at mga empleyado kaya kukulangin ang budget ng Kamara sa susunod na taon.
Sa pagsalang sa plenary deliberation ng budget proposal ng Kongreso, sinabi ni House Committee on Accounts chairman Bambol Tolentino na kulang ang P14 billion na alokasyon para sa mababang kapulungan sa 2020 kaya dapat itong dagdagan ng P1.6 bilyon.
Paliwanag ni Tolentino, nadagdagan ang deputy speakers, vice chairmen ng mga komite at maging ang mga komite ng Kamara.
Bukod dito ginawa din umano ang budget proposal noong hindi pa nagbobotohan ng speaker kaya hindi pa naikonsidera ang magiging organisasyon ng House leadership at magdadagdag ng mga deputy speakers.
Lumaki rin ang bilang ng mga miyembro ng Kamara bukod pa sa 4,000 empleyado nito kabilang na rito ang mga nasa contractual, permanent status at iba pa.
Katwiran pa ni Tolentino dapat din ipagtanggol ang budget ng Mababang kapulungan tulad ng pagtatanggol nila sa ibang ahensiya ng gobyerno tuwing budget deliberation.
Ngayong 18th Congress ay may 22 bagong deputy speakers ang Kamara.
- Latest