Pagpayag ni Duterte na makapangisda ang China sa WPS labag sa Konstitusyon
MANILA, Philippines — Malalabag ang Konstitusyon kung tahasang papayagan ang China na makapangisda sa Exclusive Economic Zone (EEZ) ng Pilipinas.
Ipinunto nina Senators Francis Pangilinan at Panfilo Lacson ang nakasaad sa Article XII, Section 2 ng Saligang Batas na puwedeng pumasok sa kasunduan ang Pangulo pero hindi ukol sa mga yamang-mineral o yamang dagat.
Partikular din aniya ang nakasaad sa Konstitusyon na ang mga yamang-mineral at yamang dagat ay nakareserba para sa eksklusibong paggamit ng mga mamamayang Filipino.
“Ang ginamit pang kataga sa ating Saligang Batas ay “reserve its use and enjoyment exclusively to Filipino citizens,” sabi ni Pangilinan.
Ang Recto Bank aniya ay bahagi ng EEZ ng Pilipinas kaya hindi dapat payagan ang pangingisda ng China.
Sinabi naman ni Lacson na wala ang salitang “friends” sa Article XII Section 2 ng Saligang Batas na nagsasabing dapat protektahan ng gobyerno ang marine wealth.
Nauna rito napaulat na sinabi ng Malacañang na kaibigan ng Pilipinas ang China kaya maaaring payagang mangisda kahit pa sa EEZ ng bansa.
- Latest