12-17 oras na walang tubig ipapatupad
Water level sa Angat Dam bumaba pa sa critical level
MANILA, Philippines — Magpapatupad ulit ang Manila Water ng panibagong schedule ng ‘rotational water service interruptions’ sa buong East Zone na tatagal nang mula 12 hanggang 17 oras bawat araw.
Ang mga ‘service interruptions’ na ito ay ginagawa para maipamahagi ang limitadong suplay ng tubig sa lahat ng mga customers upang mabigyan ang lahat ng pagkakataon na makapag-ipon ng tubig araw-araw.
Isinagawa ang naturang hakbang dahil sa nakitang lalong hihina at patuloy na makakaranas ng pagkawala ng suplay ng tubig ang maraming residente ng Metro Manila.
Ito ay dahil binawasang muli ng National Water Resources Board (NWRB) ang alokasyon ng tubig para sa Metropolitan Waterworks and Sewerage System (MWSS) at sa concesionaires na Maynilad at Manila Water ng 4 cubic meters per second (CMS) mula 40 CMS pababa hanggang 36 CMS.
Ayon sa NWRB, ibinaba ang water allocations sa mga nabanggit bunsod ng patuloy na pagbaba ng antas ng tubig sa Angat Dam na mas mababa na sa critical level na 160 meters kahapon, Sabado, Hunyo 22, 2019. Ang 4 CMS na ibabawas ay katumbas ng konsumo ng halos 700,000 na katao kada araw.
Bagama’t ang bagong schedule ng mga interruption ay nagsimula na kahapon Hunyo 22, kinakailangan pa ng mga tatlong (3) araw pagkatapos ng pagbabawas ng alokasyon bago tuluyang maisaayos ang operasyon para makamit ang tamang schedule sa ‘pagtitimpla’ o pagbabalanse ng distribusyon ng limitadong suplay ng tubig sa kabuuan ng East Zone.
Ang ‘rotational water service interruption’ ay mananatili hanggang makabawi ang water level ng tubig sa Angat Dam.
Kahapon, Sabado, ang Angat Dam ay lumampas na sa critical level na 160 meters. Ang water level ng Angat Dam kahapon ay umaabot sa 159.78 meters kahapon ng umaga na mababa sa 160.28 meters noong Biyernes ng umaga.
- Latest