P200 billion kita, 25 million jobs bubuhos sa ‘unli’ tower builders - DICT

MANILA, Philippines — Tinatayang nasa P200 billion ang potential gross income mula sa maraming interesadong cell site builders na magtatayo at mag-ooperate ng kakulangang 35,000 towers pa sa bansa, ayon sa Department of Information and Communications Technology (DICT).

“The rationalization of the telcos and the cell site builders and operators will accrue to the benefits of millions of subscribers in particular, and the Filipinos in general,” wika ni acting DICT Sec. Eliseo Rio, Jr.

Inihayag ni Rio ang positibong pananaw habang tinatapos ng DICT ang final copy ng common tower policy na, aniya, ay magbibigay-daan para mapaghusay ng market-driven forces ang telecommunications services.

Ayon pa sa DICT chief, aabot din sa 10 milyon hanggang 25 milyon na trabaho ang lilikhain ng malayang merkado para sa telco tower builders base sa 200-500 workers para sa bawat tower upang mabuo ang 50,000 towers na kinakailangan sa buong bansa. 

Dagdag pa ni Rio, ang tower sharing policy ay inaasahan ding makapagpapalakas sa financial capacity ng telcos sa pagpapahusay ng kanilang serbisyo sa mga subscriber.

Paliwanag niya, ang savings ng telcos mula sa pagtatayo at pagmamantine ng towers ay maaaring i-reallocate sa capital expenses na tutuon sa pagpapataas ng antas ng kanilang serbisyo sa mga subscriber.

Idinagdag pa ni Rio na sa final plan ay tinatayang may 5,000 towers ang itatayo taon-taon sa susunod na pitong taon para matapos ang 50,000 towers sa loob ng 10 taon, na sa huli ay magbibigay-daan para makasabay ang broadband service ng Pilipinas sa iba pang bansa.