Duterte at Nur Misuari nagkita sa Palasyo
MANILA, Philippines — Nagkausap na sina Pangulong Duterte at Moro National Liberation Front (MNLF) founding chairman Nur Misuari, kamakalawa ng gabi sa Palasyo.
Sinabi ni Presidential Spokesman Salvador Panelo na, nagkaroon ng short talk ang Pangulo at si Misuari na tumagal lamang ng 15 minuto.
Siniguro umano ni Pangulong Duterte kay Misuari na muli silang mag-uusap pagbalik nito sa bansa.
Nakatakdang lumabas ng bansa si Misuari matapos payagan ng Sandiganbayan at maglagak ng P920,000 travel bond upang dumalo sa OIC meeting.
Una rito muling nanawagan si Duterte kay Misuari na magkaroon sila ng dialogue.
Ginawa ng Pangulo ang panibagong apela kasunod nang napabalitang ilang miyembro ng MNLF ang hindi natutuwa sa naging 80-man composition ng Bangsamoro Transition Authority (BTA) dahil ilan lamang na opisyal ng MNLF ang maitatalaga dito at karamihan sa mga bumubuo rito ay mula sa karibal na grupong Moro Islamic Liberation Front (MILF).
Inatasan naman ni Pangulong Duterte ang pulis at militar na huwag gagalawin si Misuari kung ito ay lalabas mula sa kuta sa Jolo, Sulu.
- Latest