Papel ng EDSA ipinaalala ni Pangulong Duterte
MANILA, Philippines — Iniugnay ni Pangulong Rodrigo Duterte ang People Power Revolution sa pagiging matagumpay ng halalan.
Sa kaniyang mensahe sa paggunita ng 33rd EDSA revolution, sinabi ng Pangulo na dapat alalahanin ng mga mamamayan na ang naganap na rebolusyon ay may malaking papel sa halalan dahil nakamit ang kalayaan na mamili ng mamumuno sa bansa.
Binigyang halaga rin anya ang mga nawala at ang mga nabawi dahil sa naganap na rebolusyon.
Umaasa rin ang Pangulo na magsilbing inspirasyon ang okasyon sa lahat lalo na ang mga makabagong henerasyon na dapat pahalagahan ang kalayaan at karangyaan na nakamit dahil sa EDSA people power.
Kaugnay nito, naging mapayapa ang paggunita kahapon sa ika-33 anibersaryo ng EDSA People Power Revolution sa kabila ng mga inilunsad na rally ng iba’t-ibang grupo sa EDSA People Monument at EDSA Shrine.
Sa kauna-unahang pagkakataon ay hindi naman dumalo sa selebrasyon si dating Pangulong Fidel Ramos na palaging pangunahing pandangal sa pagtitipon sa mga naunang pagdiriwang dahil sa malaking papel na ginampanan niya upang maging matagumpay ang pagpapatalsik sa diktaduryang Marcos at mailuklok sa pwesto si dating Pangulong Corazon Aquino.
- Latest