Pulis bawal mag-selfie, mag-post ng ebidensya sa social media

MANILA, Philippines — Bawal mag-selfie at i-post sa social media ang mga ebidensyang droga at iba pang krimen ang mga pulis.

Ito ang mariing babala ni PNP Chief P/Director General Oscar Albayalde matapos umani ng negatibong reaksyon ang kaso ng limang rookie cops ng Talisay City Police na nag-selfie habang nag-iimbentaryo ng nakumpiskang droga noong nakaraang linggo.

Ang limang bagitong pulis ay nasibak matapos i-post sa Facebook ang kanilang selfie photo. 

Sinabi ni Albayalde na nang makarating sa kaniya ang insidente ay agad niyang inatasan ang Directorate for Investigative and Detective Management (DIDM) na magsagawa ng imbestigasyon. Dito ay lumitaw na nagla-label lang ang nasabing mga pulis sa mga ebidensyang droga na nakumpiska sa anti-drug operation.

Maaring ma-reprimand o maparusahan ang nasabing mga parak depende sa kalalabasan ng imbestigasyon.