Palasyo: Narco-politicians na manlalaban, mamamatay

MANILA, Philippines — Ilang araw matapos mapatay ang isang dating mayor sa Maguindanao, binalaan ng Malacañang ang mga pulitikong may kinalaman sa kalakalan ng droga na maaari silang sumunod kung manlalaban sa pulis.

“Anumang antas ng pamumuhay ng mga nasa drug industry, pareho-pareho ang kasasapitan nila kung makikipagbarilan sa mga otoridad," sabi ng tagapagsalita ng pangulo na si Salvador Panelo sa Ingles.

Nasawi kasi sa anti-drug operation ang dating alkalde ng Parang, Maguindanao na si Talib Abo Sr. matapos diumanong makipagbarilan nang hainan ng search warrant noong Biyernes.

Isa si Abo sa mga pulitikong iniuugnay ni Pangulong Rodrigo Duterte sa pagpapakalat ng droga noong 2016, bagay na itinanggi ni Abo.

"Pinapayagan ang mga alagad ng batas na gumamit ng dahas kapag nalalagay sa peligro ang kanilang buhay sa gitna ng isang lehitimong operasyon. Marami nang sinirang henerasyon ang salot na droga," dagdag niya.