Signal No.1 idineklara sa pagragasa ng bagyong 'Usman'
MANILA, Philippines — Itinaas ang tropical cyclone warning signal (TCWS) number one ngayong umaga sa 18 lugar habang lumalapit ang Tropical Depression Usman sa kalupaan.
Kumikilos ito ngayon pakanluran sa bilis na 15 kilometers per hour.
Namataan kaninang 10 a.m. ang mata ng bagyo 450 kilometro silangan ng Surigao City, Surigao del Norte na at nagtataglay ng aabot sa 55 kph malapit sa gitna at may pabugsu-bugsong hangin sa bilis na 65 kph.
Idineklara ang signal one (30-60kph sa susunod sa 36 oras) sa mga sumusunod na lugar:
- Romblon
- Catanduanes
- Camarines Sur
- Albay
- Sorsogon
- Masbate, including Ticao at Burias Islands
- Aklan
- Capiz
- Northern Iloilo
- Negros Occidenta
- Eastern Samar
- Northern Samar
- Samar
- Biliran
- Leyte
- Southern Leyte
- hilagang bahagi ng Cebu kasama ang Camotes Islands
- Dinagat Islands
Maaaring maging tropical storm ang sama ng panahon bago tumama sa probinsya ng Eastern Samar, Biyernes ng hapon.
"Bukas ng hapon pa natin ito inaasahan pero wala pa man 'yong sentro, magpapaulan na ito sa mga areas especially doon sa mayroong mga signal," sabi ng weather bureau sa kanilang press conference.
Posible namang itaas ang TCWS number one sa Camarines Norte, timog na bahagi ng Quezon, Marinduque, timog na bahagi ng Oriental Mindoro, Antique, natitirang bahagi ng Iloilo at Guimaras mamayang 5 p.m.
Makararanas naman ng katamtaman hanggang hanggang malakas na pag-ulan sa Metro Manila, Calabarzon, at Mimaropa simula bukas hanggang Sabado.
Magiging delikado naman ang paglalayag sa eastern seaboard ng katimugan ng Luzon, Mindanao, at northern at western seaboard ng hilagang Luzon, at mga lugar sa ilalim ng signal number one.
Inaasahan ang paglabas nito sa Philippine Area of Responsibility sa Linggo ng gabi hanggang Lunes.
- Latest
