Distressed OFWs mula Saudi dumating sa bansa

MANILA, Philippines — Nasa 109 Overseas Filipino Workers (OFWs) ang dumating sa bansa mula sa Damman, Kingdom of Saudi Arabia kahapon.

Ito ang naipangako ni Labor Secretary Silvestre H. Bello III na mapabalik sa bansa ang mga kababayan na hindi pinalad sa nasabing bansa upang makapiling ang kanilang mga mahal sa buhay ngayong Kapaskuhan.

Umaga nang lumapag sa Ninoy Aquino International Airport sakay ng Philippine Airlines (PAL) flight 683 ang distressed OFWs.

Nabatid na pinagka­looban sila ng Repatriation team ng Overseas Workers Welfare Administration (OWWA) ng transportation assistance, kabilang ang temporary shelter sa kanilang pag-uwi.

Sinabi ng OWWA na marami sa OFWs ang nag­desisyong umuwi na sa bansa dahil sa pag­­labag sa kontrata ng ka­nilang Saudi employers, gaya ng hindi pagbaba­yad ng kanilang suweldo at mga benepisyo, pagkaantala ng sweldo, kawalan ng vacation leaves at pagkabigo na makakuha ng final exit visa.

Tumanggap din naman ang mga OFWs ng special financial cash assistance habang naghihintay na makauwi sa bansa.

Pinagkalooban din sila ng cash assistance at livelihood package bago sila umuwi sa kani-kanilang lalawigan.