Senado hati sa death penalty
MANILA, Philippines — Tiniyak kahapon ni Sen. Kiko Pangilinan na haharangin ng mga senador na kasapi ng Liberal Party ang panukalang pagbabalik ng parusang kamatayan sa bansa.
Ginawa ni Pangilinan ang pahayag matapos sabihin ni Presidential Spokesperson Harry Roque na nananatiling prayoridad ng Malacañang ang death penalty para sa mga mabibigat na kaso kaugnay sa iligal na droga.
Sinabi rin ni Roque na nasa kamay ng mga senador ang usapin tungkol sa pagbabalik ng parusang kamatayan.
Aminado si Pangilinan na kailangan ang pagkilos ng lehislatura para maibalik ang parusang kamatayan pero hindi ito kakatigan ng mga LP senators.
Napatunayan na rin aniya na hindi makakapigil sa krimen ang nasabing parusa.
Sinabi naman ni Sen. Sonny Angara na hindi umuusad sa Senado ang panukala at sa huli niyang tantiya, hati ang Senado sa isyu.
Pabor naman si Senate President Tito Sotto sa panukala pero para lamang umano sa mga “high-level drug traffickers.”
Maari naman aniyang matukoy kung sino ang mga maituturing na mga high-level drug trafficker.
- Latest
