Alvarez ‘di isusuko ang ‘no-el’
MANILA, Philippines — Hindi aatras si House Speaker Pantaleon Alvarez sa paninindigan nito na ipagpaliban muna ang mid-term elections sa 2019 kaugnay ng isinusulong na paglipat sa pederalismo ng gobyerno.
Ito’y sa gitna na rin ng kaliwa’t kanang pagtutol ng iba’t ibang sektor sa ‘federal form of government” na nais ng administrasyon.
Sinabi ni Alvarez na kung hindi sasang-ayon ang Senado para sa pagpapaliban ng 2019 elections ay maari pa rin itong maisulong sa pamamagitan ng people’s initiative upang amyendahan ang probisyon ng Konstitusyon na isagawa ang halalan kada ikatlong taon.
“We have already studied that alternative, it can be done,” ani Alvarez na iginiit na kailangan lamang ng pagkakaisa ukol dito.
Binigyang diin ni Alvarez na isinasapinal pa nila ang draft ng panukalang Federal Charter sa Kongreso at sinabing umaasang hindi ito sasalungatin ng Senado.
Aniya, sakali mang mangyari ito ay isusulong nila ang Constituent Assembly (Con-Ass) para makakuha ng ¾ na boto bago ito isumite sa taumbayan para sa ratipikasyon ng referendum.
Iginiit ng House Speaker sa ilalim ng 1987 Constitution ay hindi inoobliga ang dalawang Kapulungan na mag-convene para sa Con-Ass.
Inihayag pa nito na tinatayang aabutin ng anim hanggang walong buwan bago makumpleto ang debate at deliberasyon sa Federal Charter at idinagdag pang seryoso ang pamahalaan sa Charter change para sa federal form of government.
- Latest