‘No-el’ ni Alvarez kokontrahin ng Senado
MANILA, Philippines — Hindi papayagan ng mga senador ang inilulutang na No Election o “No El” sa 2019 sa gitna ng isinusulong na pag-amiyenda sa Konstitusyon upang mabago ang porma ng gobyerno mula sa Presidential patungong Federal.
Ayon kay Sen. Grace Poe, hindi magiging katanggap-tanggap sa publiko ang anumang uri ng hakbang para madaliin ang pagbabago sa porma ng gobyerno.
Ipinalutang ni House Speaker Pantaleon Alvarez kamakalawa ang idea ng “no-election” sa 2019 upang magkaroon umano ng maayos na transition sa federalism.
Ipinahiwatig ni Poe na haharangin ng Senado ang “no-el” ni Alvarez.
“There’s the Senate that he has to deal with,” sabi ni Poe.
Maliwanag naman aniya ang nakasaad sa Konstitusyon kaugnay sa pagdaraos ng eleksiyon at kahit pa amiyendahan ang Konstitusyon kailangan pa rin ang boto ng Senado.
Naniniwala rin si Poe na hindi magiging katanggap-tanggap sa Senado at sa publiko ang no election scenario.
Hindi rin papayag ang Senado na magkasamang boboto ang House of Representatives at ang Senado sa balak na pag-amiyenda sa Konstitusyon.
- Latest
