Aguirre hindi sususpindihin ang mga piskal na nagbasura ng kaso vs Kerwin, Peter Lim

MANILA, Philippines — Hindi susunurin ni Justice Secretary Vitaliano Aguirre II ang mungkahi ng Presidential Anti-Corruption Commission (PACC) na suspindihin ang mga piskal na nagrekomenda ng pagbabasura ng kaso laban sa umaming drug lord na si Kerwin Espinosa at negosyanteng si Peter Lim.

Sinabi ni Aguirre na walang sapat na basehan upang suspindihin sina Assistant State Prosecutors Michael John Humarang at Aristotle Reyes sa kabila ng kaniyang naunang kautusan na imbestigahan ang dalawa.

Nitong Lunes lamang sa kanilang lingguhang flag ceremony ay humingi ng paumanhin si Aguirre sa iniutos na imbestigasyon sa kaniyang mga tauhan,

“I could not see any basis for such (suspension),” pahayag ni Aguirre.

“It appears that they are not familiar with the workings and procedures on how the DOJ conducts preliminary investigations,” komento ng kalihim sa PACC na pinamumunuan ni Volunteers Against Crime and Corruption founding chairman Dante Jimenez.

Iginiit ni Aguirre na hindi trabaho ng mga piskal na mangalap ng ebidensya sa preliminary investigation.

Samantala, dismayado naman ang mga piskal sa rekomendasyon ng PACC.

“We’re just doing our sworn duty and we are ready to face the allegations against us,” pahayag ng dalawang piskal.

“During the preliminary investigation, the complainant was given all the opportunity to present its case. Under the present rules, we have no authority to procure evidence on the complainant’s behalf,” dagdag nila.

Nabasura ang kasong may kinalaman sa ilegal na droga na isinampa ng Philippine National Police dahil sa mahinang ebidensya.

Hindi rin isinama ng PNP sa reklamo ang pag-amin ni Espinosa ng kaniyang ilegal na gawain.

Binatikos noon ni PNP chief Ronald dela Rosa ang DOJ dahil hindi man anila sila inabisuhan na mahina ang kanilang kaso.

Samantala, dahil sa galit ng publiko sa pagkakabasura ng kaso ay naglunsad ang DOJ ng reinvestigation sa kaso kung saan pinadadalo nila ang mga taga PNP sa pagdinig sa Abril 12.

Ipina-subpoena rin nila sina Espino, Lim at iba pang kinasuhan na sina Peter Co, Max Miro, Ruel Malindangan, Jun Pepito at Lovely Adam Impal.

Related video: