Las Vegas concert niratrat: 50 utas
Pinay, ‘person of interest’
MANILA, Philippines — Nauwi sa trahedya ang masaya sanang music festival o concert na dinumog ng mga tao sa kilalang lugar sa may Mandalay Bay Resort and Casino sa Las Vegas, Nevada sa Estados Unidos matapos na isang gunman ang walang habas na mamaril na ikinasawi ng may 50 katao habang nasa mahigit 400 pa ang sugatan, kamakalawa ng gabi.
Sa inisyal na ulat, nagulantang at nagkagulo sa lugar nang mamaril ang isang lalaking suspek gamit ang automatic rifle sa ikatlo at panghuling gabi ng 3-day Route 91 Harvest country music festival, isang sold-out event na dinaluhan ng libu-libong katao kung saan nag-perform ang mga music artists na sina Eric Church, Sam Hunt at Jason Aldean.
Ayon sa panayam ng PSN kay Foreign Affairs Acting Spokesman Robespierre Bolivar, sinabi nito na pinabe-beripika na ng DFA sa Konsulado ng Pilipinas sa Las Vegas kung may Pinoy na kabilang sa mga nasawi o nasugatan sa insidente. Habang sinusulat ang balitang ito, wala pang natatanggap na ulat ang DFA kung may Pinoy casualty sa trahedya sa konsyerto.
Sa report ng Las Vegas Metropolitan Police Department, habang nagpe-perform sa entablado si Aldean nitong Linggo ng gabi, nang makarinig ng sunud-sunod na putok nang mamaril ng dalang machine gun ang isang lalaki sanhi ng matinding kaguluhan, takbuhan at stampede ng mga dumalo kabilang ang mga Pinoy sa Vegas Strip.
Sa kanilang Twitter, sinabi ng Las Vegas Police na kanilang nabaril at napatay ang pangunahing suspek na nakilalang si Stephen Paddock, 64 matapos silang magresponde sa lugar.
“Confirming that one suspect is down. This is an active investigation. Again, please do not head down to the Strip at this time,” ayon sa tweet ng Las Vegas Metro Police.
Samantala, hawak na ng mga pulis ang isang umano’y Pinay na nakilalang si Marilou Danley na nagsisilbi ngayong “person of interest” sa nasabing madugong pamamaril.
Si Danley ay sinasabing kasama ng lalaking suspect na hindi pa tinukoy ang pagkakakilanlan.
Sinabi ni Bolivar, na inaalam din nila kung Filipino citizen si Danley na posibleng nakapag-asawa ng Amerikano dahil sa kanyang apelyido.
Kahapon ng hapon, naitala ng Las Vegas authorities na 50 katao na ang nasawi habang nasa mahigit 400 ang sugatan.
Nananatiling sarado ang Vegas Strip habang bukas na ang McCarran International Airport na unang naapaketuhan ang mga international flights malapit sa nasabing hotel na pinangyarihan ng pamamaril.
- Latest