Espinosa sa Witness Protection Program, dadaan sa proseso – DOJ
MANILA, Philippines - Dadaan sa proseso si Albuera, Leyte Mayor Rolando Espinosa Sr. para maipasailalim sa Witness Protection Program (WPP).
Ito ang tiniyak ni Justice Secretary Vitaliano Aguirre II kasabay nang pahayag na hindi naman awtomatikong makakapasok sa WPP si Espinosa dahil may sinusunod na protocol.
Ayon kay Aguirre, dadaan sa masusing evaluation si Espinosa kapag plano nitong humingi ng tulong sa DOJ para hilinging sumailalim siya sa WPP.
Sinabi ni Aguirre na hindi pa naman dumudulog sa kanila ang alkalde para mag-apply sa WPP.
Sa Malacañang, sinabi ni Presidential Spokesman Ernesto Abella na tinitimbang pa ng mga awtoridad kung puwedeng maging state witness si Espinosa.
Una nang humarap si Espinosa sa media sa Leyte noong isang linggo at nagsumite ng “drug matrix” sa Leyte-PNP kung saan nakalista ang mga personalidad na sinusuplayan ng droga ng kanyang anak na si Kerwin, kabilang umano si Senator Leila de Lima.
Sinabi ni Espinosa na pinag-aaralan na niyang magpasailalim sa WPP dahil nangangamba na siya sa seguridad ng kanyang buhay at ng kanyang pamilya.
- Latest
