‘Kongreso ang bahala sa family code’ - Palasyo

MANILA, Philippines – Ipapaubaya ng Malacañang sa Kongreso ang pagrepaso sa family code kasunod ng hakbang ng Santo Papa na pabilisin ang proseso ng annulment ng kasal.

“Ginagalang namin ang pananaw ng Santo Papa,” sabi ni Communication Secretary Hermino Coloma Jr. na nagdiin na bahala na ang mga mambabatas sa pag-aaral sa batas sa annulment na nakapaloob sa family code.

“Nasa pagpasya ng lehislatura ang pagsuri sa mga batas kung kailangang baguhin,” dagdag pa ni Coloma.

Dahil sa kawalan ng divorce sa Pilipinas, sa pamamagitan lamang ng annulment at legal separation mapapawalambisa ang kasal pero magastos at mahaba ang process.