Preliminary probe vs Villanueva, ex-DA Sec. Yap sa ‘pork’ aprub
MANILA, Philippines – Inaprubahan na ng Ombudsman ang rekomendasyon ng Field Investigation Office (FIO) ng ahensiya na isailalim na sa preliminary investigation at administrative adjudication proceedings sina TESDA director at dating CIBAC party-list Rep. Emmanuel Joel Villanueva, dating Agriculture Secretary Arthur Yap at siyam na iba pa kaugnay ng maanomalyang paggamit ng Priority Development Assistance Fund (PDAF) na may halagang P10 milyon.
Sina Villanueva at Yap ay bubusisiin sa kasong Malversation, Falsification of Public Documents at paglabag sa Graft and Corrupt Practices Act.
Nahaharap din sila sa administrative charges dahil sa Grave Misconduct at Conduct Prejudicial to the Best Interest of the Service.
Sa nakalap na dokumento ng FIO investigators ng Ombudsman, noong June 10, 2008 ang Department of Budget and Management ay nagpalabas ng dalawang Special Allotment Release Orders na may halagang P10 milyon bilang bahagi ng PDAF ni Villanueva para pondohan ang agri-based livelihood project para mamigay ng seedlings tulad ng pechay, radish, sitaw, okra at yellow corn seedlings, liquid fertilizers at post-harvest facility (thresher).
Dalawang araw makaraan nito, sinulatan ni Villanueva si Yap na humihiling na mailipat ang naturang pondo sa National Agribusiness Corporation (NABCOR) bilang implementing agency ng naturang proyekto.
Isang kasunduan ang nilagdaan ng DA at NABCOR para maipatupad ang proyekto habang nakipagkasundo ang NABCOR sa AFPI bilang project implementer.
Nadiskubre ng Ombudsman Investigators na ang NABCOR ay hindi kinilalang implementing agency para sa PDAF projects at ang AFPI na may capital stock contribution lamang na P68,000.00 ay sinasabing walang kapasidad na ipatupad ang proyekto.
Sinabi din ng Commission on Audit, na ang supplier ng farm inputs at farm implement ay hindi isang licensed fertilizer distributor at walang kasalukuyang business name registration at hindi rin makita ng mga imbestigador ang opisina ng kumpanya na nakalagay sa address nito na Malabon City.
- Latest
