KIDAPAWAN CITY , Philippines — Dalawang rebelde ang iniulat na nasawi habang dalawang iba pa ang nasugatan makaraang atakihin ng mga rebeldeng Moro Islamic Liberation Front ang kampo ng Moro National Liberation Front sa bahagi ng Sitio Snake Fish sa Barangay Nanga-an sa bayan ng Kabacan, North Cotabato kamakalawa ng umaga.
Ayon sa ulat, nilusob ng grupo nina MILF Kumander Ronnie Zamora at Gerry Genuine ng 110th Bangsamoro Islamic Armed Forces ang kampo ni MNLF Kumander Dima Ambel.
Nagawa pang makaganti ng putok ang mga MNLF forces pero dahil sa dami ng mga kaaway, nagapi sila at nakubkob ang kanilang kampo, ayon sa report.
Nagsilikas naman ang mga pamilya mula sa Barangay Nanga-an at mga kalapit barangay sa takot na madamay sa gulo ng magkalabang grupo.
Isa sa dalawang napaslang si Edrafel Ali ng MNLF group habang sugatan naman sina Kawag Simbuangan, 45; at Akmad Buhisan, 34, kapwa sundalo ng MNLF Sebangan Kutawato Revolutionary Committee sa pamumuno ni Kumander Datu Dima Ambel.
Naganap ang pag-atake sa MNLF headquarters sa Kabacan dalawang buwan makaraang gawin ng Organization of Islamic Conference, Office of the Presidential Adviser on the Peace Process, at ng MNLF sa naturang erya ang tripartite review sa 1996 GRP-MNLF final peace accord. Ang naturang pagpupulong ay dinaluhan mismo ni MNLF chairman at Cotabato City Vice Mayor Muslimin Sema.