Marcos kay Villar na!

MANILA, Philippines - Pormal nang sinelyu­han ng Nacionalista Party ni Senador Manny Villar at Kilusang Bagong Lipunan sa pangunguna ni Ilocos Norte Congressman Ferdi­nand “Bongbong” Marcos Jr., ang alyansa ng dala­wang partido sa isang seremonya sa maka­say­sayang Laurel House sa Mandaluyong City.

Sinabi ni Villar na “nag­kakaisang pagsusu­mika­pan namin ang tumitinding hamon na tugunan ang ka­hirapan na siyang patuloy na gumugupo sa mas na­kararaming mama­mayan sa pamamagitan ng pag­papalit ng liderato.”

Kinakatigan ni Marcos na tatakbong senador sa 2010 ang pangunahing adbokasiya ng NP laban sa kahirapan partikular ang pagpapalakas ng kapang­yarihan sa mahihirap sa lahat ng aspeto bilang pangunahing prayoridad.

Idinagdag pa niyang nakaangkla ang alyansang NP-KBL sa pagtitiwala at kumpiyansa sa integridad at liderato ng lider ng NP na pinagtibay ng sariling pagsusumikap laban sa kahirapan.

Ayon sa kongresista, “si Villar ay isang simpleng tao na may mapag­kum­babang pinangga­lingan ngunit may malawak na pananaw para sa ating bansa. Hindi lamang niya naintindihan ang pagiging mahirap, nagsimula ang kanyang buhay sa maliit, tulad ng mga ordinaryong Filipino.”

Idinagdag naman ng kapatid ni Bongbong na si dating Ilocos Norte Rep. Imee Marcos, pangkala­hatang-kalihim ng KBL, na “hindi na dapat kasangkot sa susunod na halalan ang mga namayapa ngunit dapat ituon sa mga kandi­dato, alinsunod sa kan­yang kuwalipikasyon at kahandaan para sa pam­publikong posisyon. (Butch Quejada)