Ayon kay MMDA Chairman Bayani Fernando, dapat papanagutin ang mga responsable sa pagsasabit ng electrical wires sa mismong traffic lights sa kanilang lugar.
Kinumpirma ni Fernando na umabot pa sa tripleng konsumo ng traffic lights, kumpara sa dating binabayaran ang konsumo sa kasalukuyan sa Metro Manila dulot ng pagkakabit ng ilegal na kuryente ng mga taong umiiwas sa pagbabayad sa Meralco.
Partikular na tinukoy ni Fernando ang may 350 pamilya ng squatter na naka-tap sa mga traffic lights ng MMDA sa Metropolitan Avenue, Pasong Tamo at Vito Cruz, Makati City.p
Kasunod ito ng isinagawang operasyon ng pinagsanib na puwersa ng mga tauhan ng MMDA, Makati Police at kinatawan ng Meralco, kamakalawa kung saan naaktuhan ang mga linyang nakasabit sa traffic lights at radio battery outlets ng MMDA. Kaagad naman itong pinagtatanggal ng Meralco linemen at Traffic Engineering team.
Hiniling ni Fernando kay P/Supt. Ely Pintang, hepe ng Security Intelligence and Investigation Office (SIIO) na siyasatin ang nasabing ugat ng paglobo ng binabayaran ng MMDA sa mga traffic lights.
Maliban pa sa pamilyang mahihirap, may ilang negosyante ng commercial establishments na nagsasamantalang magnakaw ng kuryente sa traffic lights kaya pinag-aaralan na ang paghahain ng kaso laban sa may-ari nito.
Bukod sa Makati, rumehistro din ang konsumo sa kahabaan ng North Ave. at Mindanao Ave. na direktang nag-tap ang mga squatter families doon. (Ludy Bermudo)