The Red Strings, mipaambit sa ilang teorya

CEBU, Philippines — Gilusad na sa OPM band nga The Red Strings ang ilang debut extended play (EP) nga The Red String Theory, nga gilangkoban  sa unom ka kanta bahin sa nagkalainlaing istorya ug hugna  sa gugma.

Ang EP gilusad dungan sa ilang bag-ong nahuman nga The Live Sessions Tour ug nakalangkat  na og dul-an  lima ka milyon ka streams sa Spotify. Ang unom ka kanta kay gisulat sa mga miyembro sa banda nga sila Gello Marquez, Cedryck Guda, Llana Claire Catudio, Nicholas De Rosales, Risen Santos ug Liam Barba.

Nalakip  usab sa maong mini album ang tulo ka bag-ong kanta nga “Alanganin,” “Jupiter” ug “Kalendaryo,” uban sa nauna nilang mga single nga “Nasa Ulap,” “Kupido” ug “Asado.” Si Gab Tagadtad, head sa DNA Music label, ang producer  niini.  Kahinumdoman nga naporma  ang The Red Strings pinaagi sa reality docu-series sa ABS-CBN Entertainment nga The Next Big Band.

Ang  ilang “Nasa Ulap”  kay nalakip  sa Spotify playlists nga Hot Hits Philippines, Tatak Pinoy ug OPM Rising. Madungog ang mga unod sa The Red String Theory sa nagkalainlaing digital streaming platforms.

Nior, mipalanog sa “Sindi”

Gi-release na sa alternative-indie band nga Nior ang ilang bag-ong single nga “Sindi” ubos sa AltG Records, samtang nangandam usab kini sa pagpagawas sa ilang walo ka tracks nga album karong Nobyembre.

Suma pa sa bokalista nga si Brian Nucup, naghisgot ang “Sindi”  sa walay kataposang paglaom ug kahayag nga naghatag og inspirasyon aron magpadayon sa kinabuhi matag adlaw.

Ang banda nga Nior kay gilangkoban nila  Brian Nucup (rhythm guitar ug vocals) , Gabrielle Van Polanen Petel (vocals), Jessie Ocampo (drums), Paul Tanchiatco (lead guitar), ug Christian Cervera Mallari (bass).

Madungog na ang  “Sindi” sa nagkalainlaing digital music streaming platforms.