Naglanog-lanog na ang awit nga dunay hugyaw ug positibong tema ug kini nag-ulohan og "Maniwala" nga ubos sa Viva Records.
Ang Cebuana dancer-singer nga si Jaden Narvios maoy naghatag og kinabuhi sa maong awit nga madungog usab sa YouTube Music, Spotify ug Apple Music.
Nagkanayon si Jaden nga ang nagtangag nga mensahe sa "Maniwala" kay dili dayon moatras sa mga pagsulay ug kinahanglan nga dunay dakong pagtoo nga mahatagan ra gyud og kasulbaran ang gisagobang nga suliran. Ang iyang igsoun nga singer nga si Justine Narvios maoy nagsulat sa maong awit. Matud pa nga inigkadungog sa mga tawo sa maong awit kay seguradong makasayaw gyud. Matud pa ni Jaden nga dugay na siya nga mahiligon sa musika nga mao usab ang makapa-relax kaniya.
Ang 15 anyos mga taga Talisay City kay nagmalaumon sa dakong suporta sa mga Sugbuanon sa iyang labing una nga single.
Alang kaniya nga ang pagbaton og proyekto sa Viva Records kay dili basta-basta sanglit naghatag kini og lapad nga agianan aron makahatag siya og kalingawan ngadto sa katawhan.
Nailhan na sa kadaghanan nga duna gyu'y lig-ong talento ang mga Sugbuanon sa natad sa musika. Masaligon si Jaden nga ang "Maniwala" kay maghatag og inspirasyon alang sa mga makadungog niini. Kahinumdoman nga nahimo usab siya nga kabahin kaniadto sa reality web series nga Disney Princess, Dare To Dream niadtong 2017. Nahimo usab siya nga runaway model kaniadto sa usa ka international clothing line.