Kutsara ug tinidor outfit, half-million!

Nalingaw ang netizens sa gisul-ob ni Heart Evangelista sa iyang pagrampa sa Milan Fashion Week didto sa Italy niadtong Huwebes. Angayan gyud si Heart, apan ang nakahugyaw sa netizens mao nga aduna kini gibitay nga mga kutsara ug tinidor.

Mugna kini sa Italian luxury brand nga Moschino. Caption ni Heart niini: "Adobo and extra rice please [emoji] dinner is served in @moschino of course [emoji]".

Gisusi sa pep.ph pilay kantidad sa gisul-ob ni Heart, lakip na ang cute nga bag nga gama sab sa Moschino. Ug, nasuta nga mokabat kini ngadto sa tunga sa milyon ka pesos tanan.

Ang Cady jacket nagkantidad og USD3,575 o PHP209,707.71; ang sayal, USD1,890 o PHP110,866.46; ang kwentas, USD900 o PHP52,793.55; ang ariyos EUR470 o PHP27,072.00; ug ang bag USD1,660 o PHP97,405.48.