Hello, Hollywood!

Si Liza Soberano na mismo ang nikumpirma sa huhungihong sa nilabay nga mga adlaw nga aduna siyay umaabot nga Hollywood movie. Kagahapon, gi-upload ni Liza ang screenshot sa balita sa usa ka newspaper kabahin niini. Kumpirmado gyud nga una niyang Hollywood movie mao ang horror-comedy film nga Lisa Frankenstein. Tsika sab sa kanhi manager ni Liza nga si Ogie Diaz, igsuon sa bida ang role ni Liza.

Hiniusang Pwersa…

Silyado na ang partnership deal sa ABS-CBN ug TV5, human sa pinirmahay nga nahitabo niadtong Huwebes.  Si ABS-CBN chairman Mark Lopez nipadayag nga naghinamhinam na sila nga makatabang pagpalambo sa TV5, ug maayo usab kini nga kahigayonan aron mas mapalig-on pa sa network ang ilang pagdumala og mga talent ug pagmugna usab og mga makalingaw nga programa.  Si Mediaquest Holdings Chairman Manny Pangilinan sa iyang bahin, aminado nga ang ABS-CBN gyud ang nag-unang tigmugna og entertainment content dili lamang dinhi sa nasud kundili hasta na sa abroad. Ug sila sa TV5, kanunay nga naningkamot nga makaserbisyo pa sa mga Pinoy. Pinaagi niining maong partnership, masaligon si Pangilinan nga makab-ot nila ang maong laraw. Ang Mediaquest maoy nanag-iya sa TV5.