Nagpaduol kang Julia

CEBU, Philippines – Nakapalit na og bag-ong balay si Joshua Garcia  ug doul kini sa lugar kun diin nahimutang usab ang balay sa ka-loveteam niya nga si Julia Barretto.  Mapasalamaton si Joshua sa maayong dagan sa iyang career hinungdan nga nakapundo gyud siya og maayo.

Tony nameligro

Nameligro ang pag-istar ug pagtrabaho ni  Tony Labrusca sa Pilipinas gumikan kay girekomendar sa Intelligence Division sa  Bureau of Immigration (BI) nga pasakahan og deportation complaint ang Filipino-American actor.  Nag-ugat kini sa dihang nangaway si Tony sa usa ka immigration officer human wala kini tugti nga magdugay og istar sa nasud.

Heart sa StarStruck

Usa si  Heart  Evangelista sa mga hurado  sa  bag-ong season sa  StarStruck.  Samtang wala pa nagsugod ang maong show,   todo bakasyon ang aktres sa nagkadaiyang dapit sa kalibutan.  Taod-taod na nga nipahuway si Heart sa telebisyon busa excited na kini sa umaabot niya nga proyekto.

Lig-on ang chemistry

Nagmalaumon si  Mother Lily Monteverde nga positibo ang mahimong resulta sa pelikulang  Elise nga gibidahan nila ni  Enchong Dee ug Janine Gutierrez. Suma pa ni Mother Lily nga lig-on gyud og chemistry sila si Enchong ug Janine. 

Ipaayo ang balay

Ang pagpa-renovate sa  iyang balay, mao kini ang buhaton ni  Zeus Collins  minilyon niya nga premyo sa  Minute To Win It . Suma pa ni Zeus nga dugay na gyud nga nagplano nga ipa-renovate ang iyang balay sa Rizal, busa suwerte kaayo nga nakadaog siya sa maong game show.

Bag-ong uyab?

Gidungog nga naa na’y bag-ong girlfriend  si  Jolo Revilla ug dili kini taga showbiz . Taod-taod na nga nagbuwag sila si Jolo ug ang aktres nga si Jodi Sta. Maria.  Suma pa nga gipaila-ila na ni Jolo ang maong babaye ngadto sa iyang pamilya.

Kambal , Karnabal

Mabanhaw matud pa ang  GMA Films  karong tuiga ug usa sa idalit niini mao ang  comedy movie nga pagabidahan nila ni Derrick Monasterio ug  Kim Domingo. Ang maong proyekto nag-ulohan og  Kambal, Karnabal nga ubos sa direksyon ni  Adolf Alix, Jr. Malakip usab niini sila si  Super Tekla, Jo Berry,  ug Kiray Celis .

Ikaw na Kelsey !

Nagkauban  sa hangout ang  Hollywood actor nga si Zac Efron ug ang  Pinay Victoria Secret model nga si  Kelsey Merritt.  Matud pa nga duna sila’y common friends.   Nasayran nga pwerting sikata ni Zac hangtud karon.

Regular kasagaran

Gawas sa iyang trabaho isip news personality sa ABS-CBN , busy usab si Anthony Taberna sa  iyang mga negosyo.  Gipanghambog ni Anthony  nga  regular ang istado sa  mayoridad sa iyang mga trabahante .

Nasukmagan ang nawong

Aksidenteng  nasukmagan sa kaeksena niini nga stuntman ang aktres nga si  Kylie Padilla sa usa ka  fight scene sa Kapuso show nga TODA One I Love.  Nagaras ra gamay ang nawong ni  Kylie ug  nakasinati siya og panghapdos niini. Arang-arang na hinoun ang iyang kahimtang karon.