Dagway sa Barangay Kinabuakan nga National Costume!

CEBU, Philippines — Trending  sa  social media sukad pa sa miaging adlaw ang video sa usa ka pageant contestant nga kuha atol sa national costume segment  sa iyang gisalmutan nga indigay.

Kini human nagkugos siya og bata ug nagguyod og mga kanding.

Aduna na kini 1.6 million views sa facebook, sukad gi-upload niadtong September 21. Aduna kini 29, 000 shares ug 16, 000 likes.

Ang bida sa maong video mao  si Jamaica  Mendoza nga contestant sa bag-ohay  lang gipahigayon nga Queen of Pardo 2018 .

Girepresentar ni Jamaica  ang  South Africa ug kusog nga abiba sa katawhan  maoy nilanog atol sa pagrampa niya sa entablado.

Nagmugna siya og linahi nga konsepto nga maoy nakapa-ukay sa tanan.

Imbis nga mga dagko ug naggilak gilak nga mga costume ang iyang irampa atol sa International Costume segment, live props maoy iyang gigamit.

Nagguyod siyag tulo ka kanding ug nagkugos og usa ka bata, dinuyugan sa pagputos sa iyang lawas sa mga panapton ug borloloy nga maoy nakapahisusama kaniya sa usa ka tinud-anay’ng nanimuyo sa South Africa.

“Mao to akong nahunahunaan kay I know akong mga kontra dagko kaayo og costume. Nangita ko’g pamaagi unsaon nakog pabuak sa show nga mapansin ko. So naa may kanding among silingan, akong giabangan ug nakahuna-huna ko’g nindot nga kung naay bata mas nindot gyud. Mao’ng nangita gyud ko’g bata sa audience,” matud pa niya.

Matud niya, 14 anyos pa lamang siya sa dihang nag- apilan na siya og mga beauty pageant sa mga nagkadaiyang sitio dinhi sa Sugbo.

Nagsugod siya dihang kanunay siyang pagaagnihon sa iyang mga higala nga pasalmuton niini.

Bisan sa kadagha’g mga kandidata nga iyang katigi atol sa mga nagkadaiyang kompetisyon, kanunay gayud siyang mamatikdan sa entablado tungod sa iyang pamanit.

“I’m a half black American, my father is a black American ug akong mama kay lumad nga Pardohanon. So half ko,” hirit pa niya.

Sa gipahigayung Queen of Pardo, nilandig siya isip 2nd Princess ug nalangkat sab niya ang duha ka mga minor awards nga Best in Swimsuit ug ang labing hugyaw nga Best in International Costume.

Apan gawas niining maong mga pasidungog, ubay ubay na sab nga mga kadaugan ang iyang naangkon sa pagsalmot niya’g mga beauty pageants.

Niadtong tuig 2012, nakuha niya ang Miss Talent award sa Queen of Cebu.

Nahimo sab siyang daily winner sa Super Sireyna Queen of the Ocean 2013 sa Eat Bulaga.

Laing gikalingawan ni Bhal karon mao ang iyang pagka make-up artist, dancer ug choreographer.

Mapasigarbuhon sab niyang gipaambit nga usa siya ka estudyante sa  kursong  Customs Administration sa  U. C.

Aktibo sab siyang miyembro sa LGBT-Q sa ilang dapit diin miyembro siya sa organisasyon sa Cogon Pardo Gays ug sa grupong gitawag nilang B. I. G. A. o  Barangay Inayawan Gays Association. “Nalingaw ug nalipay sad ko nga nakapakatawa ko sa tanang mga tawo nga mi-share ug mi-view sa akong mga videos. Salamat kaayo ug wa ko mag-expect ani. Happy ra ko nga nakapalingaw ko sa mga tawo. Salamat sab nilang Kapitan Litang Abarquez sa Pardo,. B. I. G. A. President Tim Carla Ocampo, Kapitan Atty. Kirk Bryan Repollo of Brgy. Inayawan, Cherry Mae Yang, Poblacion Pardo Gays Association ug sa tanan tanan, salamat gyud kaayo,” panapos pa niya.

Name:

Jamaica Bhal Mendoza

Address:

Upper Lucimba, Poblacion, Pardo, Cebu City

Birthdate:

February 14, 1988

Facebook Account: Jamaica Mendoza

Email Add: [email protected]