Great switch to a better life

CEBU, Philippines — “A lot has changed after Sinulog Idol. Dinhi nako na-discover kon asa ko mas capable when it comes to solo performing ug mas ni-okay siya kaysa sa life nako before ko niapil og Sinulog Idol”.

Mao kini ang paghulagway sa 27-anyos nga nahimong Sinulog Idol Season 4 grand champion nga si Claro Maylon Jr. kinsa mas ilado gyud karon sa tanan isip si Chingkie Maylon.

Lima ka tuig na ang milabay sa dihang naangkon ni Chingkie ang usa ka ganti nga wala gyud niya damha nga maabot sa iyang kinabuhi

Matud pa ni Chingkie dili gyud siya kontesero ug sa Sinulog Idol lamang niya nasinati ang sitwasyong ibangga siya sa mga banggiitan nga mga singer dinhi sa Sugbo.

Gisaysay ni Chingkie nga niadtong 8 anyos pa lang siya, nakadiskubre sa iyang talento mao ang iyang mga magtutudlo apan wala sa iyang hunahuna nga mosalmot og kompetisyon tungod kay matud pa niya, wala siya’y igong kompiyansa nga mosalang sa ingon niining mga butanga.

Dugay siya nakaamgo nga mahimo kini niya nga buhaton ug tungod sa iyang kanhi hinigugma, nasudlan niya ang usa ka kompetisyon nga mipausab sa dagan sa iyang kinabuhi.

Kaniadto nga wala pa masayod si Chingkie sa Sinulog Idol, usa lang siya ka ordinaryo nga tinun-an sa University of Southern Philippines nga nagkuha sa kurso nga AB-Music.

“Ni-skwela ko pero matawag nako nga ‘skwela-skwela’ ra gyud ko sa una. Di gyud ko mauwaw nga mo-admit nga bulakbol gyud ko nga pagka-estudyante. Since ni-graduate ko’g high school, kay wala gani ko kahibalo unsa ang akong kuhaon nga kurso. Nakadungog lang ko nga naay AB-Music sa USP mao to nga akong gikuha,” suma pa ni Chingkie.

Tungod kay wala kaayo’y pokus si Chingkie sa iyang pagtuon, gisudlan niya ang pagbanda.

“Ing ana lang akong life, Skwela-skwela, banda-banda, tukar-tukar lang. Apil ko sa removals pero among banda kay wala kaayo mi ilhi kay wala kaayo mi katukar og lain-lain nga lugar. Mao nga magjam-jam lang mi kun magkita mi sa akong mga kabanda,” saysay pa niya.

Nausab kining tanan dihang miapil siya sa Sinulog Idol niadtong 2014.

Gitug-an niya nga lahi ang iyang tumong sa pagtikang niya sa Sinulog Foundation niadtong nahitabo ang auditions apan gitunulan siya og application form ug gidawat lamang kini niya tungod kay gamay ra ang mipaubos og audition niadtong tungura.

“Pagsulod na nako sa audition room kay nikanta-kanta ra ko ato unya akong tan-aw ato sa una kay easy-easy lang ba”, suma pa niya.

Wala gyud siya magdahum nga madawat siya niini tungod kay balewala lang gyud alang kaniya ang iyang pag-apil.

“Nadawat man sab hinuon ko ato bisan wala gyud to nako seryosoha pag -audition ba. Honestly at first kay wala ra gyud koy na-feel nga nakapasar ko,” pagsugid niya.

Apan kining maong pagbati nahulipan dihang nagsugod na ang pagpangandam alang sa matag gabii nga kalihukan nga didto gipahigayon sa Fuente Osmeña Circle.

“Naglisod gyud ko kaayo sa preparations kay alternative man akong genre nga mao akong nakuha gikan sa pagbanda. Karon, sila Coach Jay (Unchuan) kay naa man mi workshop. First night ato kay grabe na ang coaching nila didto”, suma pa niya.

Gipadayon gyud niya ang pagkanta og usa ka alternative apan nabalaka siya sa resulta gumikan kay gamay kaayo ang mga puntos nga iyang nakuha gikan sa mga hurado.

“After the performance kay mura og naigo gani akong ego nga hala, ing ani ra ko maghunahuna nga ang akong competition nga giapilan kay mura ra og wala pero nganong nasakitan man ko og ingon ani?” Padayag ni Chingkie.

Didto nga mas nahagit  si Chingkie kun diin gipamatud-an niya nga dili lang siya basta-basta nga  singer gikan sa banda.

“Na-challenge gyud ko mao to nga tanan nga isulti sa  coaches nako kay moigo na siya tanan diri nako. Naa na gyud siya’y bili gani,” pung pa niya.

Gidawat ug gitipig ni Chingkie sa iyang alimpatakan ug kasingkasing ang tanan mga pamulong nga gihatag sa mga hurado ug sa mga nagdumala sa Sinulog Idol ngadto kaniya.

“Gipangitaan gyud ko nila og pamaagi para makapangita ko kung unsa gyud ang genre nga angay nako ug kun asa ko mas komportable. Na-switch gyud ko from that genre to a better genre,” matud pa niya.

Gikan sa alternative, mas maayo na gyud nga paminawon ang tingog ni Chingkie sa Soul RnB ug sa Pop nga genre.

“Kahibawo ang  tanang mga co-finalist nako sa una nga dili ko competitive nga pagkatawo ngadto sa uban pero competitive ko sa akong self. Ganahan man gyud ko mo-improve. Maybe mao gyud na ang rasun nganong naabot ko sa Abellana kay para maabot ko sa point nga ma-prove nako nga I can step up in a different level”, siya nagkanayun.

Mitapos siya isip  grand champion sa  maong edisyon. Bisan og wala kini niya gipangayo, mapasalamaton gihapon siya sa kadaugan nga iyang naangkon tungod sa pagsalig sa mga hurado ug sa mga tawo ngadto kaniya.

“Wala ko mag -expect nga makadaog. Nag-expect  ko nga dili ko makaabot og top 6 tungod kay nakita man sa mga judges nga relax lang ko and I’m not really into the competition gyud. I am more into learning sa kun unsay craft gyud nako kay kung matangtang ko, it’s fine kay kahibawo na man ko ato that time nga after sa competition kay our lives will change. It’s true gyud kay naa man mi gig ato after,” matud pa niya.

Dakong pasalamat niya nga sa pipila ka mga katuigan nga sukad nga nahimo title holder, gibubuan siya og corporate gigs, shows ug uban pa nga events.

Gibuhian ni Chingkie ang pagkanta sa mga banda ug gipadayon niya ang solo performing.

Gitug-an niya nga komportable na gyud siya nga mopasundayag nga siya ra apan wala niya gisirad-an ang pultahan sa pagtukar puhon  kauban ang banda tungod kay mao sab kini ang mihulma kaniya kun unsa siya karon.

Daghan na ang nahitabo sa kinabuhi ni Chingkie sulod sa lima ka tuig sukad siya midaog. Aduna may mapait ug kaharuhay nga kasinatian si Chingkie apan pabilin gihapon siya’ng mapaubsanon nga ang tanan nga iyang mahiaguman, aduna gyud kini kasulbaran.

Karon, padayon gihapon sa pagpasundayag si Chingkie sa corporate events sa nagkadaiyang bahin sa Sugbo ug nanghinaot siya nga puhon ,  tugtan sa Kahitas-an, aduna nay mosunod nga kompetisyon nga mahimo niya nga salmutan human sa kompetisyon nga miusab sa iyang kinabuhi nga mao ang Sinulog Idol.