Mag TV na! diyes is it!

Sulod sa usa ka dekada nga paghatag og kalingawan, inspirasyon ug mga istorya kabahin sa mga kasikas sa atong komunidad, mapasigarbuhon sab nga gidalit sa Mag TV Na!, ang pagsaulog sa ikasiyam nga tuig na karon sa ilang espesyal nga segment diin makahatag og kausaban dili lang sa panimalay apan lakip na sab sa kinabuhi sa bwenas nga pamilya nga maoy mapilian sa Mag TV Na! Home Make Over.

Dili lang sa pagbaylo og mga bag-o nga mga butang ang buot ug tumong sa maong segment apan nagtudlo sab kini kon unsaon ang pagpalambo sa usa ka tinipigan nga butang aron mas presentable kini tan-awon ug aron magamit sab kini pagbalik.

Namugna kining maong konsepto pinaagi sa ABS-CBN Production Manager ug Banat News Hugyaw “Attitude” writer nga si Adrian Bacolod Diongzon.

Giangkon niya nga mao nga nakamugna siya niining maong ideya tungod nakahiligan niya ang magkuri-kuri samtang wala siya’y buhaton sa ilang panimalay.

“Basta bored ko, ganahan gyud ko magpintal-pintal, mag-arrange ug unsa pa nga mahan-ay sa akong panan-aw”, suma pa niya.

Tungod kay gusto sab niya nga mahisama ang iyang panimalay sa mga pinalanggang tigsunod sa maong show, gisugyot niya ang maong ideya ngadto sa management aron makahatagan kini og katumanan.

Wala damha nga siyam ka tuig na nga naghatag og pahalipay ang maong show sa mga kapamilya nga mahatagan og tsansa sa maong home make over.

Walo ka balay sa walo ka pamilya na ang nahatagan og home make over sulod sa walo ka tuig ug sundan na kini sa ikasiyam karong tuiga.

Ang pagpili sa swerte nga mahatagan og home make over mao ang mipadangat ug misaysay og mabulawanong istorya sa kinabuhi nga angayan gyud nga hatagan og pahalipay.

Aron mas hugyaw ang mahimong home make over, gisuportahan kini sa mga ngilngig nga mga sponsor nga mao ang Island Paints, Furniture City, James Hardie, Marjuztin ug Uratex.

Miabag sab ang Philippine Institute of Interior Designers - Cebu kun PIID sa ilang katakus ug kaalam kon unsaon paghatag og maanindot nga tema sa kun unsa ang haum nga desinyo sa balay sa mananaug nga letter sender.

Suma pa sa usa sa nangulo karon sa home make over gikan sa PIID nga si Ryan James Mantujac buot nila nga mohatag og tema sa usa ka panimalay base sa istorya sa nagpadala.

Gawas sa paggama ug pagpalambo sa balay, dili lang ang mga panday ug pintor ang motrabaho niini, lakip na nga mangunay sa pagpangamot sa trabaho ang mga host sa maong show nga sila si Borgie Cabigas, Jonathan Cimafranca ug Reena Malinao-Tan. Lakip sab kaniadto ang mga kanhi hosts nga sila si Blinky de Leon ug Phoebe Fernandez.

Gisaysay ni Ka-Mags Borgie nga dili lalim ang pagpanindot sa usa ka balay apan gaan sab sa pamati ang makatabang ilabi na og makita nila nga ang ilang surprisa maoy nakahatag og kalipay sa pamilya.

“You could really feel the joy nga imong ma-receive from the recipients when they see their brand new house because ang balay man gud is not just balay lang. It’s really special para nila and very conducive para magmalipayon gyud sila”, suma pa ni Ka-Mags Borgie.

Dugang pa ni Ka-Mags Reena nga ikalipay sab nila ang makatabang ug dili na nila hunahunaon ang mga kakulian nga maagian gumikan kay magsilbi gyud kini nga pahalipay sa pamilya.

“Na-overwhelm ko kay grabe kaayo ang schedule kay usually kay whole day or half day mi nga naa didto ug unpredictable gyud kon unsa ang among buhaton. Nakahibaw na gud ko nga ingon ani siya kalisod kay dako gyud ang trabaho. Naa gyud ang bukbok, ang abog ug ang pagpanglimpyo and it’s really very overwhelming nga makita nimo from the start until the end nga naa gyuy transformation and impact nga ihatag nila sa recipient”, padayag pa ni Ka-Mags Reena.

Sa bahin sab ni Jonathan, nasinati na sab niya ang kakapoy nga bation sa nagpadala gumikan kay aduna kini deperensya sa tiil ug sak-unon ang ilang balay sanglit anaa naman sa bukirang bahin ang ilang nahimutangan.

“Last year was my most memorable year kay na-amputate ang leg ni tatay (letter sender). The day before mag-start ang home make over, I had an injury tungod sa basketball and I couldn’t walk. The first 2 days kay wala ko naka-join nila. The 3rd day kay nibawi ko pero wala gyu'y strength ang akong ankle but I was on crutches ug niingon si Reena nga uphill. Naglisod gyud ko and I felt kun unsa ang struggle ni tatay ba. Having one leg every day, unsa siya kakapoy and he is doing it all for his family”, asoy pa ni Ka-Mags Jonathan.

Karon, natapos na sab ang pagdawat nila sa mga entry. Sa sunod tuig puhon, mamahimo na sab kamo nga moapil niini pinaagi sa pagpadangat og entry pinaagi sa pagsaysay sa inyong istorya sa kinabuhi. Ilakip na niini ang imong tumong ug ngano nga angayan nga magantihan sa home make-over. Isuwat sab ang address sa panimalay ug ang gidak-on sab niini. Mas labing maayo nga ang yuta gipanag-iya gyud sa nagpuyo.

Ang mga magpadala dili lang gikan sa dinhi sa Sugbo apan lakip na sab ang anaa sa lalawigan sa   Leyte, Bohol ug Negros.

Ang Executive Producer nga si Charlie Maratas sa Mag TV Na!  nagkanayon nga ang tanan nga mopadangat sa ilang story entries adunay puruhan nga mapilian alang sa make over apan matag tuig, usa lang gyud ang swerte nga mananaog.