CEBU, Philippines — Dili na gyud malilong nga anam-anam na ang paglawig sa mga Sugbuanon sa natad sa pag-arte atubangan sa kamera.
Samotan pa gyud nga nisulod na sa eksena ang banggiitang direktor nga si Carlo J. Caparas.
Tsika pa ni Direk Carlo ngadto sa Banat News Hugyaw nga dili gyud basta-basta ang mga talento sa Sugbuanon.
Gawas sa sayaw ug pagkanta, nagpahipi usab ang abilidad niini sa pag-arte.
Usa ka Cebuana ang kapikas niya sa kinabuhi nga nipanaw na nga si Donna Villa busa duol gyud sa iyang kasing-kasing ang mga Sugbuanon.
Niadtong buhi pa ang iyang asawa, nangandoy gyud kini nga mogama og pelikula kalabot sa istorya sa pagpangidnap sa Chiong sisters, diin ang usa niini nakaplagan nga patay, samtang ang usa nagpabilin nga missing.
“Gusto ko talaga ipagpapatuloy ang plano ng asawa ko. Kaya last year, ginagawa talaga ang matinding research tungkol sa kaso. Kinausap namin yung ina ng mga biktima na si Thelma at sang-ayon naman siya sa aming plano. Nakita ko kay Thelma na isa siyang matapang na ina, na tumutulong din sa kanyang kapwa lalo na sa mga biktima ng krimen ,” saysay pa ni Direk Carlo.
Matud pa sa direktor nga kisaw kaayo didto sa kaulohan ang istorya sa Chiong sisters .
Ang maong proyekto nagtangag sa working title nga “Jacqueline Comes Home”.
Pipila sa iyang target nga pilianan nga artista aron maoy modala sa papel ni Thelma, mao sila si Manilyn Reynes, Lorna Tolentino, ug Alma Moreno apan mag-agad pa siya sa schedule sa mga nahisgutan.
Hinuon nagmalaumon ang banggiitang direktor nga makakita gyud og artista nga mohaom sa karakter ni Thelma.
Mga Sugbuanon ang mayoridad sa mga bituon sa maong movie project.
Gani gisugdan na sa miaging buwan ang audition niini alang sa mga Sugbuanon nga ganahan malakip sa maong proyekto.
Si Direk Carlo mismo inabagan sa iyang anak nga si Isabelle Peach maoy personal nga nidumala sa audition.
Aron madugangan pa ang mga Sugbuanon nga malakip niini, aduna’y laing hugna sa audition ang mahitabo karong Abril 1 ug mahimong kontakon ang usa sa mga coordinator sa maong proyekto nga si Sam Costanilla alang sa dugang kasayoran, makontak siya sa 0932 -277 -8771.
Matud pa ni Costanilla nga dili lang kay taga Cebu ang mahimong mo-audition niini, mahimo usab ang mga taga silingang dapit sa Sugbo sa nagkalain-laing parte sa Visayas.
“Abril 1 ang audition , gikan sa alas 8 sa buntag. Visayas wide audition na siya. Ang specific venue kay ipahibalo ra namo sa umaabot nga mga adlaw. Gikinahanglan kining musunod, mga batang babaye nga 9 anyos, mga babaye ug lalaki nga 16-26 anyos ug 40-50 anyos,” suma pa ni Sam.
Dili basta-basta si Caparas sanglit siya maoy nagmugna sa Panday, Kamagong, Bakekang, Totoy Bato, Joaquin Bordado, Kamandag, Elias Paniki, Tasya Fantasya, Gagambino, Pieta and Ang Babaeng Hinugot Sa Aking Tadyang, ug uban pa. Siya usab ang direktor kaniadto sa massacre movies sama sa Kuratong Baleleng ug The Cory Quirino Kidnap: NBI Files.