CEBU, Philippines — Ang paglambo dili lang kini kinahanglan nga buhaton alang lamang sa kaugalingon apan magsilbi kini nga motibasyon aron makahatag og inspirasyon ngadto sa uban aron mahimong usa ka maayong ehemplo ug maangkon ang mga tinguha sa usa ka indibidwal.
“Gusto ko mo-inspire sa mga bag-ong tubo nga gusto mo-express sa ilang kaugalingon and by becoming better. I personally came from little light scratch, and through me, ganahan ko motabang nila only if pursigido lang gyud ka maabot nimo ilang goal”, pasabot pa sa 24-anyos nga si Alden Asehan Jr. kinsa natuboy isip first runner-up sa Sinulog Idol Season 4 niadtong 2013.
Istorya ni Alden, samtang nagsabak pa iyang inahan kaniya nga si Paulita Asehan, kanunay na gyud kining mokanta. Matud pa niya nga mao gyud kini ang pagkanta ang naandan matag adlaw aron dili laayon.
Sa dihang natawo na siya, nagsugod na siya og kanta sa pagtungtong niya og 3 anyos. Gamit ang iyang “sing along” ug iyang mga natigom nga cassette tapes, nagsilbi kini niya nga instrumento aron siya makat-on.
“Sa una nga bata pako, malingaw gyud ko kon makadungog ko og mga kanta. Mao to nisuway ko ug unya didto nako na-discover nga naa koy potential gamay kay makaigo tawon ko gamay sa mga tono asoy pa ni Alden.
Aron mas mapalambo pa ang iyang nadiskubre nga talent, nagpatudlo siya sa iyang iyaan nga si Mary Ann Tuyor. Gani, nagkat-on usab siya kon unsaon ang mga ginagmay nga mga pagpasundayag.
Sa pagpangidaron niya og 7-anyos, didto siya misuway og apil og mga singing contest. Unang kompetisyon nga iyang nasalmotan mao ang gipasiugdahan sa DYLA kauban si Tita Pines. Giawit niya ang gipasikat sa Westlife nga My Love.
Nahimuot usab siya maghandum gumikan kay mura siya og giugbok nga naluya nga tanom sa yuta tungod kay nagbarog ra gyud siya sa tibuok kanta ug nakapokus ang iyang mga mata sa sawog.
Tumong niya sa maong pagsalmot mao ang pagpalit og bag-ong microphone kon makadaog siya apan napakyas ang iyang tinguha.
Sa paglabay sa panahon, hinay-hinay niya nga napalambo ang iyang kaugalingon pinaagi sa pagsalmot og mga amateur singing contest. Mao kini ang nagsilbi niya nga unang lakang una siya motikang sa mga dinagkoay na nga kompetisyon.
Gawas sa pagpalambo sa iyang kaugalingon, nakatabang usab ang mga singing contest ngadto sa iyang pamilya sa pinansiyal nga aspeto. Ang iyang madag-an nga mga premyo, mao kini ang iyang ibayad sa mga bayrunon sa eskwelahan ug ginagmay nga mga gastuhan sa panimalay.
Padayon nga gipalambo ni Alden ang iyang katakus pinaagi sa pag-apil sa CTU Choristers. Mao usab kini ang nahimo niya nga training ground aron mabaid pa ang iyang tingog .
“For three years, I became more confident and I enjoyed already to face the crowd. And I became already used to performing. Dili nako mauwaw ug mahadlok unlike atong niapil ko pagbata”, suma pa ni Alden.
Sa pagtungtong niya og first year college, una nga mitimbre ang iyang kauban sa choristers nga mibukas na sab ang ikatulo nga season sa Sinulog Idol.
Misuway siya pag-apil apan wala siya makapasar sa ikaduhang screening tungod sa wala makauyon ang mga hurado sa iyang gikanta ug gipangulbaan siya sa taman kay mao kini ang labing una nga dagko nga kompetisyon nga iyang nasudlan.
Sa sunod nga hugna, Season 4 na sa maong kompetisyon, mibalik siya pag-apil ug dakong pasalamat niya gumikan kay nadawat na gyud siya.
“I could never imagine nga akong na-pull-off ang one slot for Top 12 after my second attempt sa audition”, suma pa ni Alden.
Sa iyang pagpakigtigi sa Sinulog Idol, wala niya damha ang usa ka kakulian nga maoy mohatag kaniya og tumang pagpangulba matag gabii.
“I was suffering from laryngitis. Nakapangutana ko, nganong nahitabo man to , giatol gyud nga naa koy competiton”, saysay pa ni Alden. Gihulagway niya nga dili gyud sayon ang iyang mga kaagi sa dagan sa kompetisyon.
“Mahimuot ko kon makahinumdom ko nga na-slide ko sa upbeat night tungod kay gauwan pero dili siya obvious kay ni-heads-up ko after and ako pa gyud to ang nahimong Star Of The Night. Pero human ato, rock night na man sab, patay na gyud kaayo akong tingog ato tungod kay sakit akong tutunlan,” dugang pa niya.
Bisan pa man og dili maayo ang gibati sa iyang tutunlan, naninguha gyud siya nga makalahutay siya hangtod sa ikapito nga gabii sa kompetisyon.
Ug natuman gyud ang iyang tinguha nga makalahutay ug wala usab siya maalkansi gumikan kay midaog siya isip first runner up sa Sinulog Idol 2013.
Nagpabilin siya nga malipayon tungod sa maong dakong ganti nga iyang naangkon bisan pa man sa maong paghiagum niya sa maong sakit. Matud pa niya nga human sa maong kompetisyon, plano niya nga mopahuway aron dili gyud hingpit nga mawala ang gasa sa Ginoo ngadto kaniya.
Apan dili gyud niya angay nga balibaran ang mga oportunidad nga miabot kaniya gumikan kay sa samang tuig, mao usab to ang pagbukas sa Season 1 sa The Voice Philippines.
Nasuhong ang iyang plano sa pagpahuway. Apan wala usab siya magbasol gumikan kay naka-ani na usab siya og slot sa blind auditions.
“Bisan og wala ko nadala, but it was a great experience to step on national TV”, suma pa niya.
Human gyud sa iyang pagpanimpad sa The Voice, nakahukom gyud siya nga mopahuway sulod sa siyam ka buwan.
“Ni-take ko og mga herbal at first like luy-a ug uban pa nga makapaayo sa akong tutunlan until nibisita ko og nagkadaiyang mga ENT sa Cebu para maayo ko. Wala sab gyud ko kalimot og pahuway ug ampo. Eventually, in God’s grace, naayo gyud ko”, suma pa ni Alden.
Human sa maong pagpahuway, nabalaka na usab siya gumikan kay wala na usab siya makaangkon og scholarship nga gidalit sa CTU alang kaniya tungod kay miyembro siya sa choristers.
Karon, nagtrabaho siya isip usa ka voice coach sa Brown Academy of Music ubos sa pagdumala nila ni Anna Fegi-Brown ug Mr. Adam Brown.
“Lipay ra ko kay they gave me the chance to experience the field of teaching music. Teacher by profession ko but I am not yet on the field of teaching content subjects. Lipay ra ko I am able to impart my knowledge to younger generations through music. Nothing is more fulfilling than to see your students become better individuals not just by music but by values. Because I strongly believe no matter how good you are in your field if you don't have a good attitude you'll never go places. Also, singing became means of channeling my feelings at the same time happy ko kay naa koy mga na-inspire nga tawo”, panapos pa ni Alden.
Fast Facts
Name: Alden Asehan Jr.
Nickname: Den / Junjun
Birthday: August 10, 1993
Address: Tungkil, Minglanilla, Cebu
School & Course: Cebu Technological University / Bachelor of Science in Elementary Education (2015)
Job: Band Vocalist/ voice Teacher
Hobbies: Playing Dota 2 ug playing guitar
Height: 5'6”
Favorite Song: Close by Westlife
Favorite Genres: RnB and Jazz
Favorite Singers: Westlife, John Legend and Sam Smith
Motto: Go for it, no matter how it ends, it's an experience.
Titles/Achievements in Life:
• Compostela Got Talent 2014 - Champion
• RMN Idol 2012 - 1st Runner-Up
• Minglanilla Got Talent 2011 - 1st Runner-Up
(BANAT NEWS)