CEBU, Philippines - Nagplano karon si Lovi Poe nga ibalik ang iyang singing career busa nagsugod na siya karon og compose og mga kanta alang sa ikatulo niya nga album. Nasayran nga dunay talento sa pagkanta ang aktres ug usa kini sa iyang ipasigarbo kung duna siya’y mga mall show.
Pinangga ang fans
Nahimuot pag-ayo ang fans ni Robin Padilla gumikan kay kanunay gyud sila gahinan og oras sa ilang idolo. Matag human sa taping sa Talentadong Pinoy, dili dayon mouli si Robin gumikan kay magpahulagway kaniya ang iyang fans.
Kaso ni Billy dunggon na
Karong November 5 ang unang pagdungog sa kaso ni Billy Crawford sa Taguig-Prosecutor’s Office nga duna’y kalabotan sa iyang pagpanghagis sa prisohan gumikan sa iyang kahubog. Ang maong petsa naatol sa unang adlaw sa pagpasalida sa pelikula niya nga Moroon 5.2 -The Transformation
Okay ra wala’y GF
Tsika pa ni Andre Paras nga nalingaw na siya pag-ayo sa serye niya nga The Half Sisters sa GMA-7 busa wala pa siya’y oras sa pakigrelasyon. Nasamotan pa gyud nga na-extend ang maong serye hangtud sa Enero.
Tito Marvin
Gipakita ni Matteo Guidicelli ang pagrespeto niya kang Marvin Agustin pinaagi sa pagtawag og “Tito Marvin”. Nagpangedaron si Matteo og 24 anyos, samtang si Marvin nag-edad na og 35 anyos.
Angayan mag-beauty queen
Si Jonas Gaffud maoy naghupot karon sa career ni Kaila Estrada, ang 18-anyos nga anak nila ni Janice de Belen ug John Estrada. Adunay potensyal si Kaila nga mahimong fashion model ug beauty queen gumikan sa nindot nga height.
Moatras sa MMFF
Gidungog nga dunay duha ka mga pelikula nga moatras sa Metro Manila Film Festival 2014 gumikan kay wala pa gyud masugdi ang shooting niini busa maglisod na sila og apas sa deadline. Aduna’y mga gipang-reserba ang tagdumala sa MMFF kung dili madayon ang maong mga pelikula.
Gitambagan ni Charo
Nagkatawang gisaysay ni Angelica Panganiban nga usa ang presidente sa ABS-CBN nga si Charo Santos nga nitambag kaniya nga magpaniwang na gumikan kay niburot na ang iyang lawas.
Pard
Naporma na isip usa ka banda ang mga bitoon sa Bubble Gang nga gilangkoban nila ni Boy 2 Quizon, Antonio Aquintaña, RJ Padilla ug makauban nila ang tandem sa Moymoy Palaboy. Ang maong grupo gitawag og Pard ug duna na sila’y unang single nga nag-ulohan og Que Que.
Badminton ang gikalingawan
Dili gyud mabangbang ang abilidad ni Isabel Granada sa pagdula og badminton. Aktibo ang aktres sa pagsalmot og mga badminton tournament.
Segurado na
Gikumpirmar ni Luis Manzano ang report nga makauban sa iyang girlfriend nga si Angel Locsin ang iyang inahan nga si Vilma Santos sa usa ka pelikula. Sila si Xian Lim, Jericho Rosales ug Coco Martin maoy gipilian aron mahimong kapares ni Angel sa maong movie project.
Joey dili mobalik sa politika
Wala’y plano si Joey Marquez nga mobalik sa politika gumikan sa kagubot sa sitwasyon niini karong panahona."Lahat ng tingin ng tao sa pulitiko, kung hindi walanghiya, magnanakaw na,” suma pa ni Joey.
Wala’y klarong panagbuwag
Giangkon ni Glaiza de Castro nga wala gyu’y nahitabong “closure” sa breakup nila ni Felix Roco niadto. Bisan dugay na sila nga nagbuwag ni Felix, andam gihapon siya maminaw sa habig sa aktor.
Enchong nangunay og gasto
Usa si Enchong Dee sa mibubo og puhonan sa iyang self-titled album. Malipayon ang aktor gumikan kay wala gyud mausik ang iyang hinagoan sanglit dali ra man nga gihangop ang iyang album.
Sarah gipangandoy ni Jonalyn
Gipangandoy ni Jonalyn Viray nga makauban niya puhon sa pagkanta ang pop princess nga si Sarah Geronimo. Suma pa ni Jonalyn nga bisan kinsa nga singer, mangandoy gyud nga makauban ang mga ilado nga performer.
Anne aduna nay restaurant
Gibutyag ni Anne Curtis nga duna siya’y restaurant nga bag-ohay lang nga giablihan kung diin business partner niya ang TV host nga si Raymond Gutierrez.
Dugang pa sa aktres nga duna pa siya’y dugang duha ka mga kan-anan nga buksan puhon kung diin “eat all you can” ang tirada niini.
Ang uban niya nga restaurant buksan sugod sunod buwan ug nalipay ang aktres nga natuman na gyud ang iyang pangandoy nga makabaton og restaurant.
Perteng Lipaya
Nagsugod na ang taping ni Marvin Agustin niadtong Miyerkules alang sa iyang comeback project sa ABS-CBN nga mao ang "Flordeliza" diin makauban niya pag-usab si Jolina Magdangal. Labihan ang gibati nga kalipay ni Marvin human siya nahibalik sa ABS-CBN. Kahinumduman nga usa sa mga lig-on nga loveteam ang panagpares nila ni Jolens ug Marvin kaniadto, hangtud nga managsama sila nga nilayat paingon sa nataran sa GMA7.
Dagway og Kumagko
Gitubag ni Ruffa Gutierrez ang usa ka Instagram follower nga nihulagway kaniya nga susama og dagway sa gipatay nga transgender nga si Jeffrey "Jennifer" Laude. Kini human usa ka hulagway niya kauban sila si Phoemela Baranda ug CJ Navarata ang na-upload sa IG account sa naulahi. Tubag ni Ruffa, susama matud pa og dagway sa kumagko niya sa tiil ang nawong sa maong follower.
Walay hunong
Nagtinubagay na sab sila si Carla Abellana ug Geoff Eigenman sa masig nila ka mga Instagram. Dili man tinuod direkta nga ginganlan nila ang usa’g-usa, apan ang mga netizen, dako og pagtuo nga nagpinikhanay na sab ang duruha ka kanhi manag-uyab. Post ni Geoff nga ganahan matud pa siya mupalagot og mga tawo nga naglagot na niyang daan. Bawos nga post ni Carla mao nga pasagdan na lamang matud pa ang mga tawo nga negatibo ang imahinasyon, diha sa negatibo nila nga kalibutan, kauban sa negatibo nila nga bank account.
Baby Boy
Nanganak na ang kanhi PBB housemate ug model nga si Wendy Tabusalla. Lalaki ang gihimugso ni Wendy nga paganganlan niya og Carlo 11, isip pahinungod sa amahan niini nga si Carlo Romero, kinsa sama usab niya nga housemate sa nahisgutang reality-show sa ABS-CBN kaniadto.
Gimingaw Ako
Gipadayag ni Raymart Santigo ang iyang kamingaw sa iyang mga anak nga sila si Sabina ug Santino pinaagi sa Instagram kagahapon. Suma pa ni Raymart nga gimingaw na siya sa mga nahisgutan nga iyang gakson kaniadto, simhutan niya ang gininhawa inig ka buntag, ug lutuan. Panghinaot niya nga makita na niya ang iyang mga anak puhon ug mabuhat niya ang ilang gikamingawan.
Trabaho Lang
Nag-upload og hulagway si Lovi Poe diin makita nga daw gipugngan siya sa iyang uyab nga si Rocco Nacino. Caption ni Lovi mao nga aduna matud pay binuhat nga daw dili musugot nga mag-photo shoot siya nga sexy. Apan matud ni Lovi wala siya'y mahimo, trabaho lamang.