CEBU, Philippines - Todo diet ug workout ang gibuhat ni Ellen Adarna isip preparasyon sa iyang pagrampa ugma sa gabii sa The Naked Truth: Bench Underwear Fashion Show 2014 sa SM Mall of Asia Arena. Seguradoon ni Ellen nga mahimong hugyaw ang pagrampa niya sa entablado.
Second choice si Tom
Okay lang kang Tom Rodriguez kung second choice ra siya isip host sa bag-ong game show sa GMA-7 nga Don't Lose The Money. Ang importante kang Tom nga nahatagan siya og big project sa GMA-7. Nasayran nga unang gitanyag ngadto kang Richard Gomez ang maong show.
Dementia gigastohan og maayo
Masaligon ang direktor sa horror movie nga Dementia nga si Perci Intalan nga magustohan gyud kini sa moviegoers . Suma pa ni Perci nga dako gyud ang nagasto sa maong pelikula apan nagdumili siya pagbutyag sa kantidad. Nakadawat og grado nga "A" gikan sa Cinema Evaluation Board ang nahisgutang pelikula.
Gipangulitawhan sa mga politiko
Gibutyag ni Mariel Rodriguez nga daghan gyud ang niduol sa iyang bana nga si Robin Padilla aron pasalmoton sa piniliay karong 2016. Suma pa ni Mariel nga puros kini gipangbalibaran ni Robin gumikan kay gusto niining mo-focus sa iyang showbiz career.
Follow-up project gipaabot
Naghinapos na ang seryeng Ang Dalawang Mrs. Real sa GMA-7 apan wala pa'y ideya si Maricel Soriano kung unsa ang iyang follow-up project sa maong network. Wala hinuon mabalaka si Maricel sanglit nasayod siya nga dili siya pasagdan sa GMA-7.
Vhong nabalaka
Nabalaka si Vhong Navarro sa iyang seguridad human nakagawas na sa prisohan sila si Cedric Lee ug Zimmer Raz niadtong Martes sa hapon. Suma pa ni Vhong nga lig-on ang iyang ebidensya busa seguradoon gyud niya nga makabalik sa prisohan ang maong mga tawo nga nibun-og kaniya niadtong Enero 22, 2014.
Wala gikaulaw
Nasayod si AiAi delas Alas nga dunay mga tawo nga dili makasabot sa relasyon nila ni Gerald Sibayan. Suma pa sa aktres nga kever siya kung 20 anyos si Gerald ug ang labing importante nga wala siya gikaulaw niini.
Reaksyon ni Robin giatngan
Gipadayag ni Kylie Padilla nga nagpaabot pa siya sa komento sa iyang amahan kalabot sa iyang pag-angkon nga type niya si Rayver Cruz kinsa leading man niya sa pelikulang Dilim. Suma pa ni Kylie nga masinabtanon ang iyang amahan.
Supportive boyfriend
Nitunol sa iyang init nga suporta si Jolo Revilla ngadto sa iyang girlfriend nga si Jodi Sta. Maria. Nitambong gyud kini sa premiere night sa pelikulang Maria Leonora Teresa niadtong Martes sa gabii kung diin usa si Jodi sa mga bida niini.
Cine Europa
Nalakip ang pelikulang Metro Manila sa 17th Cine Europa film festival sa Shangri-La Plaza (Mandaluyong City). Usa kini ka British Film nga gibidahan sa Filipino stars nga sila si John Arcilla, Jake Macapagal ug Althea Vega.
Hubo nga Ellen gipistahan sa internet!
Gikondena sa Esquire Philippines ug sa Summit Media mismo ang pagkatap sa mga hubo nga hulagway ni Ellen Adarna sa internet kagahapon. Nasayran nga ang maong mga hulagway kuha atol sa photo shoot ni Ellen para sa April 2014 issue sa magazine.
Apan matud pa sa Summit Media, ang maong mga hulagway nga naghubo si Ellen wala gyud mamantala sa maong magazine busa nakugang sila nganong nikatap ang mga hulagway.
Nagkasabot matud pa ang magazine ug ang kampo ni Ellen nga dili ipagawas ang maong mga hulagway. Gumikan sa nahitabo nalapas matud pa ang dignidad ni Ellen ug ang katungod sa magazine.
Nalapas usab matud pa ang katungod sa photographer nga si Jake Versoza gumikan sa paglugwa sa maong mga hulagway nga walay pagtugot.
Gumikan niini, dili matud pa sila muhunong hangtud nga matumbok nila kinsay responsabli sa pagkatap sa maong mga hubo nga hulagway ni Ellen nga walay pagtugot, hangtud nga mapahamtangan nila og legal nga aksyon.