Bulawanong Atis

Niadtong naa pa ko sa elementary, adunay bulan sa kada tuig kung diin permi mi palinyahon arun timbangon, pakan-on og pospas, tagaan og vitamins ug timbangon na pud og balik.

Mura mi og mga binuhing baboy. Dakong tingala nako niadto ug sa dihang anaa nako sa saktong buot , nasayran nako nga gitawag man diay to og Nutrition Month nga saulogon sa matag buwan sa Hulyo.

Hulyo na man diay karon, ang mga tinun-an üg mga eskwelahan nagsaulog na sa Nutrition Month nga adunay tema nga “Gutom at Malnutrition, Sama-sama Nating Wakasan.

Apan dili lamang ang mga estudyante angay magsaulog niini, lakip na kitang mga ate, kuya, mama, papa, lola, lola ug uban pa. Kay kitang tanan adunay lawas nga angay ampingan. Busa mag-istorya kita mahitungod sa pag- amping sa atong panglawas.

Adunay daghang modernong health tips nga pwede natong buhaton ug gamiton. Apan lahi ra gyud kung mag-gamit kita og natural nga pamaagi sa pag-atiman sa atong “health”.

Mga prutas ug utanon mao’y gipasanginlan sa akong  Lola Pising  kung nganong hangtud karon buhi pa daw siya sa edad nga 84.

Ug dili ikalimod, buhi, gwapa ug sexy gihapon si Lola. Siguro panahon na nga isalikway na nato ang pagkaon og mga instant foods, fast foods ug uban pang moderno nga klase sa mga pagkaon.

Panahon na nga panid-an ang atong palibot, puwes diskubreha ang atis o sugar-apple”.

Ayaw isnaba ang atis gumikan kay aduna kini hugyaw powers. Ang buot kong ipasabot mao nga daghan kini og  gamit. Dili lang ang bunga apil na ang dahon ug uban pa nga parte sa punoan niini.

Mga Benepisyo sa Atis:

* Ang Atis abunda sa calcium, vitamin C ug phosphorus ug adunay sugar content nga 50-50 (glucose ug sucrose).  Mopalig-on  usab kini sa                  muscles.

*Ang hilaw nga atis pwede e-tambal sa diarrhea ug uban pang mga digestive pain.

* Makahimo usab ka og atis juice nga motabang sa paglikay sa mga bitok.

* Ang nilusak nga preskong dahon niini mahimong ipasimhot sa tawo nga nakuyapan.

* Ang binukalan nga hilaw nga atis mahimong gamiton sa paghunad sa samad ug makaayo sa mga katol-katol.

* Ang binukalan nga dahon makapahupay sa rheumatic pain kun kini ikaligo.

* Ang binukalan nga dahon mahimong pagpaalim  sa sip-on ug hilanat.

* Ang gidugmok nga liso mahimong isagol sa coconut oil ug e-apply sa scalp aron mawagtang ang kuto.

 Tuara mga suki nga ka-bonding sa Banat News IN, daghan gyud  og gamit ang Atis. Puwes, kung wala mo nagtanom niini, sulong namo sa duol nga merkado sa inyong dapit.  Mag-atis na ta!

Inyo diay kong madungog sa 95.5 Star FM gikan sa Lunes hangtud sa Biyernes sa programang  It’s All For You In The Afternoon  (1-3pm) ug It’s All For You In The Evening ((9-12 midnight).

ESKINA KUSINA  DJ Radcliffe, 93.9 I-FM

Hello  mga ka- iyers nga suki sa  Banat News, maayong adlaw kaninyong tanan ug  mobalik na sab ko aron modalit kaninyo og  recipe sa lamian nga pagkaon.

Hugyaw ra  akong recipe karon kay para gyud ni sa masa gumikan kay barato ra gyud kaayo ang ingredients niini.

Ihalad nako ninyo ang recipe sa paborito nako nga  apple orange pudding , ug relax lang mo gumikan kay sayon ra gyud kaayo ang paghimo niini.

Naa gyud ang apple ug orange gumikan kay napuno kini sa bitamina ug haom pa gyud kaayo, kay nagsaulog kita karon sa nutrition month.

Haom kaayo kini aron lami ang inyong snacks ug mahimo usab nga imo kining idalit sa bisan unsa nga okasyon busa seguradong enjoy ka!. Mag-uban na usab kita puhon alang sa sunod nga recipe sa Eskina Kusina sa Banat In.  Ayaw mo og kalimot sa pagpaminaw sa akong programa, ang iSnackTime sa 93.9 I-FM , Lunes hangtud sa Biyernes ( 3pm to 6pm).

Tara na magluto na ta!

Mga sagol:

5 Apples (hiniwa); 5 Oranges (unod); 10 pan (hiniwa); 2 Boxes nga  Raisins; 2 Condensada (350ml); 2 Creams (350ml); 1 1/2 CUP brown o white sugar; 1 tasa nga tubig; 1 kutsara nga asin; 8 itlog

Pamaagi

1. Paandaron ang oven  nga moabot ngadto sa 280 degrees Celsius. Isagul ang tubig, itlog, asin, asukal, cream, condense, ug orange sa mixer. Taronga  pag- mix hangtud dili na maklaro ang egg white ug  yolk, ug lanaya pag-ayo ang  asukar.

2. Ang pan, apple, raisins, isulod sa usa ka lawom nga tray nga adunay margarine o dairy cream nga gi-spread. Make sure nga maayo kaayo ang pag- spread sa apple, pan ug  raisins sa tray.

3. Make sure nga level ang pan ug ang gi-mix nimo nga ingredients para dili pud siya kaayo uga o basa. Kuhag tinidor and slowly press down sa pan nga milabaw kay dapat matarong gyud og sagol  ang tanan. Bake it ug  ipahimutang  gikan sa 15 ngadto  20 minutos sa oven. Ug tuara, naluto na gyud, ug mangaon na ta!.